"அமைச்சர்கள், அரசு அலுவலர்கள் இதைச் செய்ய வேண்டும் எனச் சட்டம் இயற்றுவேன்" - சீமான் சொல்வது என்ன?

கோவை விமான நிலையத்தில் நாம் தமிழர் கட்சி ஒருங்கிணைப்பாளர் சீமான் செய்தியாளர்களுக்குப் பேட்டியளித்தார்.

அப்போது அவர், “ஒவ்வொரு கட்சியும் தங்களின் பலத்தை அதிகரிப்பதற்காக தேர்தலில் கூட்டணி வைப்பார்கள்.

நாங்கள் எந்தக் கட்சியுடனும் கூட்டணி வைக்கவில்லை. என்னை நம்பியுள்ள 8 கோடி மக்களுடன்தான் நான் கூட்டணி வைத்துள்ளேன். என்னுடைய வெற்றி எப்போதும் எனக்கானதல்ல. அதேபோல என்னுடைய தோல்வியும் எனக்கானதல்ல.

தமிழ்நாட்டில் தனியார் முதலாளிகள் லாபம் ஈட்டும் தொழிலாக கல்வி இருப்பதால், அரசுப் பள்ளிகள் தரம் உயர்த்தப்படவில்லை. போக்குவரத்து மற்றும் அரசு மருத்துவமனைகளும் அதனால்தான் தரம் உயர்த்தப்படுவதில்லை.

அரசுப் பள்ளிகளில் தரம் குறைவதால் குழந்தைகள் தனியார் பள்ளிகளுக்குச் செல்கிறார்கள். அரசால் கொடுக்க முடியாத ஒரு கல்வியை, மருத்துவத்தை தனியார் முதலாளி கொடுப்பார் என்றால், அங்கே அரசு தோற்றதாக அர்த்தம்.

என்னிடம் ஆட்சியை வழங்குங்கள். பிறகு அரசுப் பள்ளி, கல்லூரிகளுக்குச் செல்லும் மாணவர்களின் எண்ணிக்கை அதிகரிக்கிறதா இல்லையா என்று பாருங்கள்.

அரசுப் பள்ளிகளில் படிக்கும் மாணவர்களுக்கு வேலையில் முன்னுரிமை, அமைச்சர் முதல் அனைத்து அரசு அலுவலர்களின் குழந்தைகளும் அரசு பள்ளியில்தான் படிக்க வேண்டும் என்று தனிச்சட்டமாகக் கொண்டு வருவோம். அப்படிச் செய்தால் அரசுப் பள்ளிகளின் தரம் தானாக உயர்ந்துவிடும்” என்றார்.