`அரசுப்பள்ளி மாணவர்கள் மோதல்'- தலையில் தாக்கப்பட்ட 12-ம் வகுப்பு மாணவன் மூளைச்சாவு அடைந்த சோகம்

கும்பகோணம் அருகே பட்டீஸ்வரம் பகுதியில் அறிஞர் அண்ணா மாதிரி மேல்நிலைப்பள்ளி உள்ளது. இந்தப் பள்ளியில் கும்பகோணம், பட்டீஸ்வரம், உடையாளூர், பம்பப்படையூர் மற்றும் அதனைச் சுற்றியுள்ள பல்வேறு கிராங்களைச் சேர்ந்த மாணவர்கள் படித்து வருகின்றனர். இந்தப் பள்ளயில் திருவாரூர் மாவட்டம் வலங்கைமான் இனாம்கிளியூர் பகுதியைச் சேர்ந்த 17 வயது மாணவன் 12-ம் வகுப்பு படித்து வருகிறார். இவருக்கும் அதே பள்ளியில் 11-ம் வகுப்பு படிக்கும் மாணவருக்கும் கடந்த செப்டம்பர் மாதம் 18ம் தேதி வாக்குவாதம் ஏற்பட்டு ஒருவரை ஒருவர் அடித்துக்கொண்டனர்.

இதில் 11-ம் வகுப்பு மாணவனின் மூக்கில் காயம் அடைந்து கும்பகோணம் அரசு மருத்துவமனையில் சிகிச்சை பெற்றார். மேலும் இது தொடர்பாக 11-ம் வகுப்பு மாணவனின் பெற்றோர் பட்டீஸ்வரம் காவல் நிலையத்தில் புகாரளித்தனர். இந்த புகாரைப் பெற்றுக்கொண்ட போலீசார் மாணவர்களின் நலன் கருதி இருதரப்பினரின் பெற்றோரை வரவழைத்து பேச்சுவார்த்தை செய்தும், எச்சிரிக்கை செய்தும் அனுப்பி வைத்தனர். பள்ளி நிர்வாகமும் சமாதானம் செய்து வைத்தனர். இந்நிலையில் கடந்த 3ம் தேதி அந்த 12-ம் வகுப்பு மாணவன் தன் நண்பர்களுடன் மதிய உணவு இடைவெளியின்போது 11-ம் வகுப்பு மாணவன் தரப்பைச் சேர்ந்த ஒரு மாணவன் மீது இடித்துவிட தகராறு ஏற்பட்டுள்ளது.

மேலும் இதுதொடர்பாக முன்விரோதமும் ஏற்பட்டு மாணவர்களுக்கிடையே மோதல் நீடித்தது. இந்த நிலையில் 4ம் தேதி மாலை சிறப்பு வகுப்பை முடித்துவிட்டு பள்ளியிலிருந்து 12ம் வகுப்பு மாணவன் தன் நண்பர்களுடன் வீட்டுக்குச் சென்றுள்ளார். பட்டீஸ்வரம் கோயில் அருகே சென்றபோது 11ம் வகுப்பு மாணவர்கள் 12ம் வகுப்பு மாணவர்களைத் தாக்கியுள்ளனர். இவர்களும் திருப்பி அடித்துள்ளனர். இதில் 12ம் மாணவனை 11ம் வகுப்பு மாணவர்கள் மரக்கட்டையால் தலையில் பலமாக அடித்துள்ளனர். இதில் ரத்தவெள்ளத்தில் மாணவன் கீழே சரிந்து விழுந்தார். சாலையில் நடந்த இந்த மோதல் சம்பவம் கடும் அதிர்ச்சியை ஏற்படுத்தியது.

அருகில் இருந்தவர்கள் மாணவனை மீட்டு கும்பகோணம் அரசு மருத்துவமனையில் சிகிச்சைக்கு சேர்த்தனர். கட்டையால் அடித்ததில் மாணவனுக்கு மூளையில் ரத்தக்கசிவு இருப்பது தெரியவந்தது. இதையடுத்து, மேல் சிகிச்சைக்காக கும்பகோணம் தனியார் அனுமதிக்கப்பட்டார் மாணவன். இந்த சம்பவம் தொடர்பாக பட்டீஸ்வரம் போலீசார் வழக்குப்பதிவு செய்த நிலையில் உதவி போலீஸ் சூப்பிரண்டு அங்கித் சிங் விசாரணை நடத்தினார். மேலும் 12ம் வகுப்பு மாணவரைத் தாக்கிய 11ம் வகுப்பு மாணவர்கள் 15 பேரைக் கைது செய்து சிறுவர் சீர்திருத்தப் பள்ளியில் அடைத்தனர்.

இந்நிலையில், அந்த மாணவன் மூளைச்சாவு அடைந்ததால், அவருக்கு மேல் சிகிச்சை அளிப்பதற்காக, தனியார் மருத்துவமனையிலிருந்து, தஞ்சாவூர் மருத்துவக்கல்லுாரி மருத்துவமனைக்குக் கொண்டு செல்லப்பட்டு தீவிர சிகிச்சைப் பிரிவில் அனுமதிக்கப்பட்டார். ஐந்து பேர் கொண்ட டாக்டர்கள் குழுவினர், மாணவனுக்கு தீவிர சிகிச்சை அளித்துவருகின்றனர். இதில் மாணவரின் பெற்றோர் மற்றும் உறவினர்கள் சோகத்தில் மூழ்கியுள்ளனர். இதனால் வேறு எதுவும் பிரச்னை ஏற்படாதவாறு இருக்க மாணவனின் வீடு, பள்ளி மற்றும் பட்டீஸ்வரம் பகுதிகளில் போலீஸார் தீவிர பாதுகாப்புப் பணியில் ஈடுபட்டுள்ளனர்.