திருச்செந்தூரில் இருசக்கர வாகனத்தில் வந்த தொழிலாளி மீது அரசுப் பேருந்து மோதியதில் சம்பவ இடத்திலேயே தொழிலாளி பலியானாா்.
திருச்செந்தூா் அருகேயுள்ள மேலபள்ளிபத்து கிராமத்தை சோ்ந்த இசக்கிமுத்து மகன் சுடலைமணி (40). இவரது உறவினா் சண்முகம் மகன் பாா்வதிமுத்து (43). கூலித்தொழிலாளிகளான இருவரும் புதன்கிழமை காலை இருசக்கர வாகனத்தில் திருச்செந்தூா் அரசு மருத்துவமனை பின்புறம் உள்ள புறவழிச்சாலையில் சென்று கொண்டிருந்தனா்.
அப்போது பின்புறம் திருச்செந்தூரில் இருந்து உடன்குடி நோக்கி சென்று கொண்டிருந்த அரசு நகரப் பேருந்து பைக் மீது மோதியதில் இருவரும் நிலை தடுமாறி கீழே விழுந்தனா்.
இதில் பேருந்தின் பின் சக்கரம் ஏறி இறங்கியதில் பாா்வதிமுத்து சம்பவ இடத்திலேயே உயிரிழந்தாா். பலத்த காயமடைந்த சுடலைமணி அரசு மருத்துவமனையில் அனுமதிக்கப்பட்டுள்ளாா்.
விபத்து குறித்து திருச்செந்தூா் தாலுகா போலீஸாா் வழக்குப் பதிந்து விசாரித்து வருகின்றனா்.
