ஆப்பிள் ரசிகர்களே.! முதல் Foldable ஐபோன் iPhone 18 Pro உடன் அறிமுகம்? - வெளியாகும் தகவல்கள்!

ஆப்பிள் ரசிகர்கள் பல ஆண்டுகளாக ஆவலுடன் எதிர்பார்த்துக் கொண்டிருந்த அந்த தருணம் நெருங்கிவிட்டது. சாம்சங், ஒன்பிளஸ் போன்ற நிறுவனங்கள் ஃபோல்டபிள் போன் மார்க்கெட்டில் இறங்கிய நிலையில், ஆப்பிள் தனது முதல் மடிக்கக்கூடிய ஐபோனை (Foldable iPhone) களமிறக்கத் தயாராகிவிட்டது என்கிறார்கள்.

வரும் செப்டம்பர் மாதம் நடைபெற உள்ள ஆப்பிளின் வருடாந்திர நிகழ்வில், புதிய ஐபோன் 18 ப்ரோ சீரிஸ் உடன் இந்த ‘ஐபோன் ஃபோல்டு’ (iPhone Fold) அறிமுகம் செய்யப்படும் என தகவல்கள் வெளியாகியுள்ளன. இது டெக் உலகில் மிகப்பெரிய அதிர்வலைகளை ஏற்படுத்தியுள்ளது.

முதல் ஃபோல்டபிள் ஐபோன்

இந்த புதிய ‘ஐபோன் ஃபோல்டு’ ஒரு நோட்புக் ஸ்டைலில் வடிவமைக்கப்பட்டுள்ளதாக கூறப்படுகிறது. அதாவது, போனை மடிக்கும்போது வெளிப்புறத்தில் 5.3 இன்ச் கவர் டிஸ்ப்ளேவும், விரிக்கும்போது உள்ளே 7.6 இன்ச் பிரதான திரையும் இருக்கும் என்கிறார்கள்.

இதன் மூலம் ஒரு மினி டேப்லெட் பயன்படுத்தும் அனுபவத்தை பயனர்கள் பெற முடியும். இந்த ஃபோல்டபிள் போனின் மிக முக்கிய சிறப்பம்சமாக, இதன் பிரதான OLED திரையில் மடிக்கும்போது எந்த ஒரு கோடும் (crease) தெரியாத வண்ணம் பிரத்யேக தொழில்நுட்பத்தை ஆப்பிள் பயன்படுத்தியிருப்பதாக கூறப்படுகிறது.

இது உண்மையென்றால், ஃபோல்டபிள் போன் சந்தையில் இது ஒரு புதிய புரட்சியாகவே இருக்கும். மேலும், இதன் மொத்த தடிமன் மடித்த நிலையில் வெறும் 9.8mm ஆகவும், டைட்டேனியம் கொண்டு உருவாக்கப்பட்ட hinge மிகவும் உறுதியாகவும் இருக்கும் என எதிர்பார்க்கப்படுகிறது.

சமீபத்தில் வெளியான Sonny Dickson-இன் ட்வீட்டில், இந்த போனின் டம்மி யூனிட் வெள்ளை நிறத்தில் மட்டுமே இருப்பது போல தெரிகிறது. அதனால், ஆரம்பத்தில் ஒரு சில நிறங்களில் மட்டுமே இது வெளியாக வாய்ப்புள்ளது.

iPhone 18 Pro மற்றும் Pro Max - என்ன அப்டேட்?

ஃபோல்டபிள் போன் தான் இந்த நிகழ்வின் ஹைலைட் என்றாலும், ஐபோன் 18 ப்ரோ மற்றும் ப்ரோ மேக்ஸ் மாடல்களிலும் சில முக்கிய மேம்பாடுகள் செய்யப்பட்டுள்ளன. முந்தைய மாடல்களை விட சற்று தடிமனாக வடிவமைக்கப்பட்டுள்ள இந்த போன்களில், பெரிய பேட்டரி மற்றும் மேம்படுத்தப்பட்ட கேமரா சென்சார்கள் பொருத்தப்பட்டுள்ளன. இதன் மூலம் பேட்டரி ஆயுள் மற்றும் கேமரா தரம் இன்னும் சிறப்பாக இருக்கும். வழக்கம் போல, இந்த முறையும் சில புதிய பிரத்யேக நிறங்களில் ஐபோன் 18 ப்ரோ சீரிஸ் அறிமுகமாகும் என எதிர்பார்க்கலாம்.

வேற லெவல் வேகம் - A20 Pro சிப்செட்!

செயல்திறனைப் பொறுத்தவரை, ஆப்பிள் எப்போதும் ஒரு படி மேலே தான் இருக்கும். அந்த வகையில், ஐபோன் 18 ப்ரோ சீரிஸ் மற்றும் ஐபோன் ஃபோல்டு ஆகிய இரண்டு மாடல்களிலுமே ஆப்பிளின் அடுத்த தலைமுறை 2nm தொழில்நுட்பத்தில் உருவான சக்திவாய்ந்த A20 Pro சிப்செட் பயன்படுத்தப்பட உள்ளது. இந்த சிப்செட் இதுவரை இல்லாத வேகத்தையும், மேம்பட்ட AI செயல்திறனையும் வழங்கும் என்பதால், கேமிங் முதல் மல்டி டாஸ்கிங் வரை அனைத்தும் மிகவும் மென்மையாக இருக்கும்.

புதிய வெளியீட்டு உத்தி!

வழக்கமாக அனைத்து ஐபோன் மாடல்களையும் செப்டம்பர் மாதமே அறிமுகம் செய்யும் ஆப்பிள், இந்த முறை தனது உத்தியை சற்று மாற்றியுள்ளது. விநியோகச் சங்கிலி மற்றும் சந்தைப்படுத்துதலில் ஏற்படும் அழுத்தத்தைக் குறைப்பதற்காக, ஐபோன் 18 ப்ரோ மற்றும் ஐபோன் ஃபோல்டு மாடல்களை மட்டும் முதலில் அறிமுகம் செய்துவிட்டு, அதன் பிறகு ஐபோன் 18, ஐபோன் 18e மற்றும் ஐபோன் ஏர் 2 ஆகிய மாடல்களை 2027-ஆம் ஆண்டு வசந்த காலத்தில் வெளியிட திட்டமிட்டுள்ளது. இது ஆப்பிளின் ஒரு புத்திசாலித்தனமான நடவடிக்கையாக பார்க்கப்படுகிறது.

மொத்தத்தில், இந்த ஆண்டு ஆப்பிள் நிகழ்வு வழக்கமான ஒன்றாக இல்லாமல், ஃபோல்டபிள் போன் என்ற புதிய பரிமாணத்துடன் ரசிகர்களுக்கு மிகப்பெரிய ட்ரீட் கொடுக்க காத்திருக்கிறது. ஐபோன் ஃபோல்டின் விலை மற்றும் மற்ற விவரங்களுக்காக செப்டம்பர் வரை காத்திருப்போம்.