இணையவழியில் கடன் வாங்கியவருக்கு மிரட்டல்: போலீஸாா் விசாரணை

புதுச்சேரியில் இணையவழியில் கடன் வாங்கியவருக்கு மிரட்டல் விடுத்த மா்ம நபா்கள் குறித்து போலீஸாா் வழக்குப் பதிந்து விசாரித்து வருகின்றனா்.

புதுச்சேரி ரெட்டியாா்பாளையத்தைச் சோ்ந்தவா் பாலமுருகன். இவா், கடந்த சில நாள்களுக்கு முன்பு இணையவழியில் ரூ.28 ஆயிரம் கடன் பெற்றாராம்.

அதை, அவா் வட்டியுடன் சோ்த்து ரூ.35 ஆயிரமாக செலுத்தியதாகக் கூறப்படுகிறது. ஆனாலும், கூடுதல் பணம் கேட்டு சம்பந்தப்பட்ட நிறுவன ஊழியா்கள் எனக் கூறி மா்ம நபா்கள் மிரட்டல் விடுத்தனராம்.

பணம் தராவிட்டால் அவரது புகைப்படத்தை அவதூறாக சித்தரித்து சமூக வலைதளங்களில் பரப்பி விடுவதாகவும் மிரட்டியுள்ளனா்.

இதுகுறித்து, பாலமுருகன் அளித்த புகாரின் பேரில், புதுச்சேரி இணையவழிக் குற்றப் பிரிவு போலீஸாா் வழக்குப் பதிந்து விசாரித்து வருகின்றனா்.

இதேபோல, புதுச்சேரி அரியாங்குப்பத்தைச் சோ்ந்தவா் அன்பழகன். இவரை, கைப்பேசியில் தொடா்புகொண்ட மா்ம நபா், தன்னை வங்கி மேலாளா் என அறிமுகப்படுத்தி கொண்டாரம்.

அதன்படி, அவரது கடன் அட்டை மதிப்பை அதிகப்படுத்துவதாகக் கூறி ஓடிபி எண்ணை கேட்டுள்ளாா். அன்பழகன் அவருக்கு வந்த ஓடிபி எண்ணை கூறிய நிலையில், அவரது வங்கிக் கணக்கிலிருந்து ரூ.89,962 எடுக்கப்பட்டது தெரியவந்தது.

இதுகுறித்த புகாரின் பேரில், இணையவழிக் குற்றப் பிரிவு போலீஸாா் வழக்குப் பதிந்து விசாரிக்கின்றனா்.