`இன்ஷூரன்ஸ் இல்லாமல், எப்.சி. காலாவதியான போலீஸ் ஜீப் விபத்தில் 3 பேர் உயிரிழப்பு' - அதிர்ச்சி தகவல்

போலீஸ் வாகனம் மோதி ஒரே குடும்பத்தைச் சேர்ந்த மூன்று பேர் உயிரிழந்த சம்பவத்தில் டிரைவர் மீது வழக்குப்பதிவு செய்யப்பட்டுள்ள நிலையில் சம்பந்தப்பட்ட போலீஸ் வாகனம் இன்சூரன்ஸ், எப்.சி காலாவதியான நிலையில் ஓடிக்கொண்டிருந்ததாக, வெளியாகியுள்ள தகவல் பரபரப்பை ஏற்படுத்தியுள்ளது.

மதுரை சிட்டம்பட்டியைச் சேர்ந்த பிரசாத், மனைவி சத்தியா, 2 வயது குழந்தை அஸ்வினுடன் அனஞ்சியூர் பகுதியில் துக்க நிகழ்ச்சியில் கலந்துகொண்டு சோனேஸ்வரி என்ற உறவினரையும் ஏற்றிக்கொண்டு மதுரை நோக்கி வந்து கொண்டிருந்தனர்.

அனஞ்சியூர் விலக்கு பகுதியில் பிரசாத் குடும்பத்தினர் டூ வீலரில் வந்துகொண்டிருந்த அப்போத எதிரே வந்த போலீஸ் வாகனம், கட்டுப்பாட்டை இழந்து மோதியதில் 3 பேரும் உயிரிழந்தனர். பலத்த காயமடைந்த சோனைஈஸ்வரி மருத்துவ சிகிச்சையில் உள்ளார்.

உயிரிழப்பை ஏற்படுத்தியது போலீஸ் வாகனம் என்பதால் கோபமடைந்த மக்கள் சம்பவ இடத்திலேயே போராட்டம் நடத்தினார்கள். வாகனத்தில் வந்தவர்களை கைது செய்து நடவடிக்கை எடுக்க வேண்டும் என்று வலியுறுத்தி போராட்டம் செய்த மக்களை சிவகங்கை எஸ்.பி சமாதனப்படுத்தினார்.

இறந்தவர்களின் உடல்கள் மதுரை அரசு மருத்துவமனையில் உடற்கூராய்விற்கு அனுப்பப்பட்ட நிலையில் மதுரையிலும் மருத்துவமனை முன் உறவினர்கள் போராட்டம் நடத்தினர்.

தமிழக அரசு சார்பில் உயிரிழந்தோரின் குடும்பத்திற்கு தலா ரூ 3 லட்சமும், காயமடைந்தவருக்கு ரூ 1 லட்சம் என நிவாரணம் வழங்க உத்தரவிட்டார்.

இதனையடுத்து போலீஸ் வாகன டிரைவர் பாலமுருகன் மீது சிவகங்கை மாவட்ட காவல்துறை மூன்று பிரிவின் கீழ் வழக்குப்பதிவு செய்து விசாரணை நடத்தி வருகின்றனர்.

இந்நிலையில் இச்சம்பவத்தில் சம்பந்தப்பட்ட போலீஸ் வாகனம் TN23 G 0787 கடந்த 31-5-2010 அன்று சென்னையில் பதிவு செய்யப்பட்டுள்ளது, அதன் இயக்கத் தகுதி நாள் கடந்த 30-5-2025 அன்றுடன் நிறைவடைந்து அதைக் கடந்து இயங்கி வந்தது தெரிய வந்துள்ளது. மேலும், வாகன இன்ஷூரன்ஸ் கடந்த 11-2-2018 அன்றுடன் நிறைவடைந்துள்ளதும் தெரியவந்துள்ளது.

இதுபோன்ற தகுதியற்ற அரசு வாகனங்கள் இயங்குவதற்கு தடை விதிக்க வேண்டும், இல்லையென்றால் இதுபோல கட்டுப்பாட்டை இழந்து அதிகளவு அப்பாவிகளின் உயிருக்கு அச்சுறுத்தலை ஏற்படுத்தும் என்று மக்கள் தெரிவித்து வருகின்றனர்.