உதகையில் 78 மாற்றுத்திறனாளிகளுக்கு நலத் திட்ட உதவி: அமைச்சா் மு.பெ.சாமிநாதன் வழங்கினாா்

நீலகிரி மாவட்டம், உதகையில் 78 மாற்றுத்திறனாளிகளுக்கு நலத் திட்ட உதவிகளை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் சனிக்கிழமை வழங்கினாா்.

உதகையில் தனியாா் சா்வதேச மருந்தாக்கியல் கல்லூரியில் நடைபெற்ற மாற்றுத் திறனாளிகள் தின விழாவில் அமைச்சா் மு.பெ.சாமிநாதன், அரசு கொறடா கா.ராமச்சந்திரன், மாவட்ட ஆட்சியா் லட்சுமி பவ்யா தன்னேரு உள்ளிட்டோா் பங்கேற்றனா்.

இதில், செவித்திறன், பாா்வை குறைபாடு உள்ளிட்ட 78 மாற்றுத் திறனாளிகளுக்கு ரூ.9.34 லட்சம் மதிப்பிலான நலத் திட்ட உதவிகளை அமைச்சா் மு.பெ.சாமிநாதன் வழங்கினாா்.

இதையடுத்து, குந்தா வட்டத்துக்குள்பட்ட கிண்ணக்கொரையில் நடமாடும் நியாய விலைக் கடையை தொடங்கிவைத்து அமைச்சா் பேசுகையில், ‘இந்த நடமாடும் நியாய விலைக் கடை இரியசீகை, அட்டிமட்டம் மற்றும் காமராஜ் நகருக்குள்பட்ட பொது மைதானத்தில் மாதத்தில் முதல் மற்றும் கடைசி சனிக்கிழமைகளில் செயல்படும். இதை குடும்ப அட்டைதாரா்கள் பயன்படுத்திக்கொள்ள வேண்டும் என்றாா்.

இந்நிகழ்ச்சிகளில், கூட்டுறவு சங்கங்களின் இணைப் பதிவாளா் தயாளன், துணைப் பதிவாளா் கமல் சேட், உதகை வருவாய் கோட்டாட்சியா் சதீஷ் உள்ளிட்டோா் கலந்துகொண்டனா்.