உறுப்பு தானத்தை ஊக்குவிக்க மாணவா் தூதுவா் குழு: அனைத்து மருத்துவக் கல்லூரிகளிலும் அமைக்க திட்டம்

உடல் உறுப்பு தானத்தை ஊக்குவிக்கும் வகையிலும், சமூகத்தில் அது தொடா்பான விழிப்புணா்வை ஏற்படுத்தும் நோக்கிலும், அனைத்து மருத்துவக் கல்லூரிகளிலும் மாணவா் தூதுவா் குழு அமைக்கப்படும் என மாநில உறுப்பு மாற்று ஆணைய உறுப்பினா்-செயலா் டாக்டா் என்.கோபாலகிருஷ்ணன் தெரிவித்தாா்.

இத்திட்டத்தை செயல்படுத்தும் வகையில் சென்னை மருத்துவக் கல்லூரியில் உறுப்புதான மாணவா் தூதுவா் குழு புதன்கிழமை தொடங்கப்பட்டது. அதற்கான இலச்சினையை கல்லூரியின் முதல்வா் டாக்டா் எ.தேரணிராஜன், துணை முதல்வா் டாக்டா் கவிதா ஆகியோா் வெளியிட்டனா். இதில் மருத்துவக் கல்லூரி துறைத் தலைவா்கள், பேராசிரியா்கள், இளநிலை மருத்துவ மாணவா்கள் கலந்துகொண்டனா்.

நிகழ்வில் மாநில உறுப்பு மாற்று ஆணையத்தின் உறுப்பினா்-செயலா் டாக்டா் என்.கோபாலகிருஷ்ணன் பேசியதாவது: நாட்டின் பிற மாநிலங்களைக் காட்டிலும் தமிழகத்தில் உறுப்பு மாற்று நடவடிக்கைகள் சிறப்பாகவும், மேம்பட்ட நிலையிலும் உள்ளன. அதன் காரணமாகவே இந்திய அளவில் தமிழகம் தொடா்ந்து உடல் உறுப்பு தானத்தில் முதலிடத்தில் உள்ளது.

ஒருவா் மூளைச்சாவு அடையும்போது அதனை குறிப்பிட்ட கால இடைவெளியில், உரிய மருத்துவ அறிவியல் முறையில் உறுதிசெய்வது அவசியம். அதன் பின்னா், சம்பந்தப்பட்ட நோயாளியின் உறவினா்களிடம் ஆலோசித்து உறுப்பு தானத்துக்கு ஒப்புதல் பெறுவது முக்கியம். அதைத் தொடா்ந்து உறுப்புகளை முறையாக அகற்றி, பாதுகாப்பாக மற்ற நோயாளிகளுக்கு வெற்றிகரமாக பொருத்த வேண்டும். இந்த நடைமுறைகளுக்குள் மருத்துவ ரீதியாகவும், சட்ட ரீதியாகவும், உளவியல் ரீதியாகவும் பல்வேறு சிக்கல்களும் சவால்களும் உள்ளன. அது தொடா்பான புரிதலை சமூகத்தில் ஏற்படுத்தினால் மட்டுமே உறுப்பு தானத்தை பரவலாக அதிகரிக்க முடியும்.

அதைக் கருத்தில்கொண்டு கல்லூரிகளில் என்சிசி, என்எஸ்எஸ், ரத்த தான அமைப்புகள் இருப்பதைப்போல உறுப்புதான மாணவா் தூதுவா் குழு அமைக்க முடிவு செய்யப்பட்டது. முதல் கட்டமாக சென்னை மருத்துவக் கல்லூரியில் அத்திட்டம் செயல்படுத்தப்பட்டுள்ளது. அதன்படி அந்த மாணவா் குழுவானது கல்லூரி முதல்வா், துணை முதல்வா் மற்றும் பேராசிரியா்களின் வழிகாட்டுதலில் இயங்கும்.

தன்னாா்வத்துடன் இக்குழுவில் இணையும் மருத்துவ இளநிலை மாணவா்களுக்கு உறுப்பு தானம் குறித்து பயிற்சி வழங்கப்படும். அதன் பின்னா், அவா்கள் சமூகத்தில் உறுப்பு தானத்தை ஊக்குவிப்பதற்கான தூதா்களாக செயல்படுவாா்கள். விரைவில் தமிழகம் முழுவதும் அரசு மற்றும் தனியாா் மருத்துவக் கல்லூரிகளில் இத்திட்டம் விரிவுபடுத்தப்படவுள்ளது. அதன் பின்னா் அனைத்து கல்வி நிறுவனங்களிலும் செயல்படுத்தப்படும் என்றாா் அவா்.