காற்றில் பறந்த தீப்பொறி; வீட்டுக்கு வாங்கிய பட்டாசில் விழுந்து வெடித்ததில், தொழிலாளி பலி!

சிவகாசியில், தீபாவளி‌ பண்டிக்கைக்காக சிறுவர்கள் பட்டாசு வெடித்தபோது, காற்றில் பறந்து வந்த தீப்பொறி, தொழிலாளி வாங்கிவந்த பட்டாசு மீது பட்டு வெடித்ததில், தீக்காயம் அடைந்தவர் உயிரிழந்தார்.

இந்த சம்பவம் குறித்து போலீஸிடம் விசாரித்தோம் அப்போது நம்மிடம் பேசியவர்கள், "விருதுநகர் மாவட்டம், சிவகாசி புதுத்தெருவைச் சேர்ந்தவர் காளிராஜன் (வயது 52), பட்டாசு தொழிலாளி. இவர் கடந்த 30-ம் தேதி தீபாவளி பண்டிகைக்காக வீட்டிற்கு பட்டாசு வாங்கி வந்துள்ளார். அப்போது வீட்டருகே சிறுவர்கள் வெடித்து விளையாடியிருக்கின்றனர். இதிலிருந்து பறந்த பட்டாசு தீப்பொறி காளிராஜன் கொண்டுவந்த பட்டாசு பாக்கெட்டுகள் மீது விழுந்துள்ளது. இதனால் பற்றிக்கொண்ட பட்டாசுகள் சரசரவென வெடித்து காளிராஜன் மீது தீப்பற்றியது.

உடல் முழுவதும் பரவிய தீயால், படுகாயமடைந்த காளிராஜன் சிவகாசி அரசு மருத்துவமனையில் சிகிச்சைக்காக அனுமதிக்கப்பட்டார். தீவிர சிகிச்சையில் அனுமதிக்கப்பட்டிருந்த அவர், சிகிச்சை பலனின்றி இன்று உயிரிழந்தார். சிறுவர்கள் விளையாட்டாய் வெடித்த பட்டாசில் இருந்து பறந்துவந்த தீப்பொறிப்பட்டு, தீக்காயமடைந்த தொழிலாளி சிகிச்சை பலனின்றி உயிரிழந்த சம்பவம், அப்பகுதியில் சோகத்தை ஏற்படுத்தியது. இந்த சம்பவம் குறித்து சிவகாசி நகர் போலீஸார் வழக்குப்பதிவு செய்து விசாரணை நடத்தி வருகின்றனர்" என்றனர்.