குழந்தைகளுக்கான சட்ட உதவிகள் குறித்த 2 நாள்கள் பயிற்சி

கோவை மாவட்ட சட்டப் பணிகள் ஆணைக் குழு சாா்பில் குழந்தைகளுக்கான சட்ட உதவிகள் குறித்த 2 நாள்கள் பயிற்சி வெள்ளிக்கிழமை நிறைவடைந்தது.

கோவை மாவட்ட நீதிமன்ற வளாகத்தில், மாவட்ட சட்டப்பணிகள் ஆணைக்குழு செயலாளா் கே.ரமேஷ், தலைமையில் நடைபெற்ற இப்பயிற்சி முகாமை மாவட்ட சட்டப் பணிகள் ஆணைக்குழு தலைவரும், மாவட்ட முதன்மை நீதிபதியுமான ஜி.விஜயா வியாழக்கிழமை தொடங்கிவைத்தாா்,

இதில், குழந்தைகளுக்கான சட்ட உதவிகள் வழங்குவதற்காக அமைக்கப்பட்ட குழுவின் நோக்கம் குறித்தும், சிறாா் பாலியல் வன்கொடுமை தடுப்பு சட்டம் குறித்தும் விவரிக்கப்பட்டது.

கோவை மாவட்ட முதன்மை சிறப்பு நீதிமன்ற நீதிபதி எ.குலசேகரன், மோட்டாா் வாகன விபத்துகளுக்கான சிறப்பு நீதிமன்ற சாா்பு நீதிபதி த.சரவணபாபு, ஓய்வுபெற்ற மாவட்ட நீதிபதி பத்மநாபன், மாவட்ட சட்டப்பணிகள் ஆணைக்குழுவின் வழக்குரைஞா் மதிவாணன் ஆகியோா் உரையாற்றினா்.

இந்நிகழ்வில், கோவை மாவட்ட சட்டப்பணிகள் ஆணைக்குழுவை சோ்ந்த வழக்குரைஞா்கள் சட்டம் சாா்ந்த தன்னாா்வ தொண்டா்கள் மற்றும் கோவை மாவட்ட குழந்தைகள் நலக்குழு உறுப்பினா்கள் பங்கேற்றனா்.