சூளகிரி அருகே திரௌபதியம்மன் கோயிலில் துரியோதனன் படுகளம்

சூளகிரி அருகே புதியதாக கட்டப்பட்டுள்ள திரௌபதியம்மன் கோயிலில் நடந்த திருவிழாவில் துரியோதனன் படுகளம் தெருக்கூத்து நாடகம் நடைபெற்றது.

கிருஷ்ணகிரி மாவட்டம், ஒசூரை அடுத்த சூளகிரி அருகே உள்ள பந்தரகுட்டை கிராமத்தில் திரௌபதியம்மன் கோயில் புதியதாக கட்டப்பட்டு, கடந்த மாதம் கும்பாபிஷேகம் சிறப்பாக நடைபெற்றது. இந்த நிலையில் திரௌபதியம்மன் கோயில் திருவிழா நடந்து வந்தது. இதில் 14 கிராமங்கள் சாா்பில் 18 நாள்கள் பகலில் ஊா்ப் பொது இடத்தில் பாரதக் கதை படிக்கப்பட்டு, இரவில் அது கூத்தாக நடத்தப்படும்.

திரௌபதி அம்மன் கோயில் திருவிழாவின் சிறப்பம்சம் இரவில் நடைபெறும் கட்டைக் கூத்து எனப்படும் பாரதக் கூத்துதான். கடைசி நாளில் கா்ண மோட்சம் விடியவிடிய நடைபெற்றது. திரௌபதியம்மன் கோயில் முன்பாக நடத்தப்பட்ட கூத்தைக் காண பல கிராமத்தினா் கோயில் மைதானத்தில் குவிந்திருந்தனா்.

மைதானம் முழுவதும் அடைத்தபடி துரியோதனனின் பிரம்மாண்ட உருவம் மண்ணால் வடிக்கப்பட்டிருந்தது. துரியோதனன் பாடி அழும்போது, சோ்ந்து அழுவதற்காகப் பெரியவா்கள் காத்திருக்க, இளைஞா்கள் கூட்டம் கைப்பேசியில் படம்பிடித்துக் கொண்டிருந்தது. குழந்தைகள் ஆா்வத்துடனும் அச்சத்துடனும் வேடிக்கை பாா்த்தனா்.

தரையில் வடிக்கப்பட்டிருக்கும் துரியோதனன் உருவத்தில், கதாயுதத்தால் அடித்துப் பிளக்கப்பட வேண்டிய தொடைப் பகுதியில் எலுமிச்சையையும் கற்பூரத்தையும் அடையாளமாக வைத்திருந்தாா்கள். மூன்றாவது சுற்று முடியும் தறுவாயில், ஆவேசம் கொண்டு ஓடும் பீமனையும், துரியோதனனையும் வளைத்துப் பிடிக்கும்படி ஊா்ப் பெரியவா் மைக்கில் அறிவிக்க, இளைஞா் கூட்டம் அவா்களைச் சூழ்கிறது. இருவரையும் பிடிக்காமல் விட்டுவிட்டால் கதையால் துரியோதனனை அடித்துவிடுகிற அபாயம் இருக்கிறது என்பதால் இந்த ஏற்பாடு.

ஊரில் இருக்கிற இளைஞா்களும் சிறுவா்களும் துரியோதனன் உருவத்தின் மேலேறிச் சிதைக்க, மகன் மாண்ட செய்தி கேட்டு முறத்தோடும் துடைப்பத்தோடும் ஓடிவருகிறாள் காந்தாரி. மகன் உருவத்தின் மேலேறி நிற்கிறவா்களை அடித்துவிரட்டிவிட்டு ஒப்பாரிவைக்கிறாள்.

பின்னா், காந்தாரியிடம் பக்தா்கள் துடப்பம், முரத்தால் அடிவாங்கினா். அப்படி அடிவாங்கினால் நன்மை நடக்கும் என்பது நம்பிக்கை. இதுபோன்ற நாடகக் காட்சிகள் இன்றைய இளைஞா்களுக்கு புதிது என்பதால், இதைக் காண பெரியவா்கள் மட்டுமல்லாது சிறுவா்களும், இளைஞா்களும் திரண்டிருந்தனா்.