கூகுளில் அதிகம் தேடப்பட்ட விளையாட்டு வீரர்கள் யார்? கோலி, மெஸ்ஸிக்கு இடமில்லை..!
தருமபுரி: ஃபென்ஜால் புயல் காரணமாக தருமபுரி மாவட்டத்தில் தொடா்ந்து பெய்து வரும் கனமழையால் பல்வேறு இடங்களில் ரயில்வே பாலங்கள், தரைப்பாலங்கள் நீரில் மூழ்கின. சாலைகள் துண்டிக்கப்பட்டன. கடந்த 24 மணி நேரத்தில் மாவட்டத்தில் மொத்தம் 981.9 மி.மீ. மழை பதிவானது. இதனால் மக்களின் இயல்பு வாழ்க்கை பாதிப்படைந்தது.
தருமபுரி மாவட்டத்தில் கடந்த மூன்று நாள்களாக இடைவிடாமல் தொடா்ந்து மழை பெய்து வருகிறது. இதனால், நீா் நிலைகள் வேகமாக நிரம்பி வருகின்றன. ஞாயிற்றுக்கிழமை வழக்கத்தைவிட காலை முதலே கனமழை பெய்தது. இந்த மழை திங்கள்கிழமை காலை வரை நீடித்தது. இதனால், பல்வேறு இடங்களில் தாழ்வான பகுதிகளில் மழைநீா் சூழ்ந்தது.
தருமபுரி நகரில் ஆவின் நகா், ஏஎஸ்டிசி நகா், நந்தி நகா் ஆகிய பகுதிகளில் மழை வெள்ளம் சூழ்ந்தது. இதனால் இப்பகுதி மக்கள் பெரும் சிரமம் அடைந்தனா்.
தரைப்பாலங்கள் மூழ்கின: இலக்கியம்பட்டி அழகாபுரி பகுதிகளிலும் வெள்ளநீா் தேங்கியது. சனத்குமாா் நதியில் வெள்ளப்பெருக்கு ஏற்பட்டதால் பாரதிபுரம்-அன்னசாகரம் இணைப்புச் சாலையில் உள்ள தரைப்பாலத்தை மூழ்கியபடி வெள்ளநீா் சென்றது. வெள்ளாலப்பட்டியிலும் தரைப்பாலம் மூழ்கியது.
வத்தல்மலை சாலை அடித்துச் செல்லப்பட்டது:
தொடா் கனமழையால் வத்தல்மலையிலிருந்து மழை வெள்ளம் பெருக்கெடுத்து ஜாலாற்று வழியாகச் சென்றது. அப்போது அளவுக்கு அதிகமாக வெள்ளம் பெருக்கெடுத்ததால், வத்தல்மலை அடிவார சாலை மழை வெள்ளத்தில் அடித்துச் செல்லப்பட்டது.
இதனால், வத்தல்மலையில் உள்ள மலைக் கிராமங்களுக்கு போக்குவரத்து முற்றிலும் துண்டிக்கப்பட்டது. தகவல் அறிந்ததும் ஊரக வளா்ச்சித் துறை, வட்டார வளா்ச்சி அலுவலா்கள், வருவாய்த் துறையினா் அங்கு சென்று தற்காலிக தரைப்பாலம் அமைக்கும் பணிகளில் ஈடுபட்டு வருகின்றனா்.
காரிமங்கலத்திலிருந்து திப்பம்பட்டி செல்லும் சாலையில் பந்தராபஅள்ளி அருகே நெடுஞ்சாலையில் சாலையோரம் இருந்த கிணற்றின் சுவா் மழை காரணமாக இடிந்து கிணற்றுக்குள் விழுந்தது. அப்போது சாலையின் ஒரு பகுதியும் சேதமடைந்தது. இதையறிந்து காவல் துறையினா், நெடுஞ்சாலைத் துறையினா் அங்கு சென்று தடுப்புகளை வைத்து வாகனங்களை ஒருபுறமாக செல்ல வழிவகை செய்தனா்.
பாலக்கோடு அருகே மோதுகுலஅள்ளி, கம்மநாயக்கன்பட்டி ஆகிய ரயில்வே தரைப்பாலங்களில் மழைநீா் தேங்கி நின்ால் அப்பகுயில் உள்ள கிராமங்களுக்குச் செல்ல முடியாமல் பொதுமக்கள் தவித்தனா். இதனால் ஆவேசமடைந்த பொதுமக்கள் ரயில் பாதையில் அமா்ந்து போராட்டத்தில் ஈடுபட்டனா். அவா்களை வருவாய்த் துறையினரும் காவல் துறையினரும் சமாதானப்படுத்தி கலைந்துபோகச் செய்தனா்.
தருமபுரி மாவட்ட மழை அளவு (மி.மீ) விவரம்:
தருமபுரி 75.5, பாலக்கோடு 80.4, மாரண்டஅள்ளி 62, பென்னாகரம் 113, ஒகேனக்கல் 85, அரூா் 331, மொரப்பூா் 37, பாப்பிரெட்டிப்பட்டி 198, அதிகபட்சமாக அரூரில் 331, நல்லம்பள்ளியில் குறைந்தபட்ச அளவும் மழை பதிவானது. மொத்தம் 981.9 மி.மீ. மாவட்டத்தின் சராசரி மழையளவு 109.1 மி.மீ.
