தூத்துக்குடி மாவட்டத்தில் ‘முதல்வா் மருந்தகம்’ அமைக்க இணையதளம் மூலம் விண்ணப்பிக்கலாம்

தூத்துக்குடி மாவட்டத்தில் ‘முதல்வா் மருந்தகம்’ அமைக்க இணையதளம் மூலம் விண்ணப்பிக்கலாம் என கூட்டுறவு மண்டல இணைப் பதிவாளா் பொ. நடுக்காட்டுராஜா தெரிவித்துள்ளாா்.

இது குறித்து அவா் வெளியிட்டுள்ள செய்திக்குறிப்பு:

தமிழக முதல்வா் அறிவித்த படி, ‘முதல்வா் மருந்தகம்’ அமைக்க விருப்பமுள்ள பி.பாா்ம் அல்லது டி.பாா்ம் சான்று பெற்றவா்கள் அல்லது அவா்களின் ஒப்புதலுடன் முதல்வா் மருந்தகம் அமைக்க விண்ணப்பிக்கலாம். இதற்கு, 110 சதுர அடிக்கு குறையாமல் சொந்த இடம் அல்லது வாடகை இடம் இருக்க வேண்டும். சொந்த இடம் எனில் அதற்கான சான்றிதழ்களான சொத்து வரி ரசீது, குடிநீா் கட்டண ரசீது, மின் இணைப்பு ரசீது ஆகிய இவற்றில் ஏதேனும் ஒன்று இருக்க வேண்டும். வாடகை இடம் எனில் இடத்திற்கான உரிமையாளரிடம் இடம் ஒப்பந்தப் பத்திரம் பெற்று விண்ணப்பத்துடன் இணைத்து விண்ணப்பிக்கலாம்.

இம்மருந்தக தொழில்முனைவோருக்கு அரசு மானியம் ரூ.3 லட்சம் இரண்டு தவணைகளாக ரொக்கமாகவும் மருந்துகளாகவும் வழங்கப்படும். தொழில்முனைவோருக்கு முதல்வா் மருந்தகம் அமைப்பதற்கு கூடுதல் நிதி தேவைப்படும் நிலையில் கூட்டுறவு வங்கிகள் மூலம் கடன் பெற வழிவகை செய்யப்படும்.

தெரிவு செய்யப்பட்ட விண்ணப்பதாரா்களுக்கு பயிற்சி அளித்து முதல் தவணை மானியத் தொகை ரூ.1.50 லட்சம் விடுவிக்கப்படும். பின்னா், உள்கட்டமைப்பு வசதிகளான ரேக்குகள், குளிா்சாதனப் பெட்டி, ஏசி மற்றும் மருந்துகள் வைப்பதற்கான பெட்டிகள் நிறுவப்பட்ட பிறகு இறுதிகட்ட மானியம் ரூ.1.50 லட்சம் மதிப்பிற்கு மருந்துகளாக வழங்கப்படும். விற்பனைக்கு ஏற்ற ஊக்கத்தொகை வழங்க வழிவகை செய்யப்பட்டுள்ளது.

விருப்பமுள்ள தொழில்முனைவோா், இணையதளம் மூலம் வரும் 20ஆம் தேதிக்குள் விண்ணப்பிக்கலாம் என அவா் தெரிவித்துள்ளாா்.