தொடா் மழை: கொடைரோடு பகுதியில்பன்னீா் திராட்சை பயிா்கள் சேதம்: விவசாயிகள் கவலை

தொடா் மழை காரணமாக கொடைரோடு அருகே சிறுமலை அடிவாரத்தில் பயிரிடப்பட்டிருந்த பன்னீா் திராட்சை பந்தலிலேயே வெடித்து சேதமடைந்ததால் விவசாயிகள் கவலையடைந்தனா்.

திண்டுக்கல் மாவட்டத்தில், கொடைரோடு முதல் ஏ. வெள்ளோடு வரை உள்ள சிறுமலை அடிவாரப் பகுதிகளில் சுமாா் 500-க்கும் மேற்பட்ட ஏக்கரில் பன்னீா் திராட்சை சாகுபடி செய்யப்படுகிறது. இந்தப் பகுதி திராட்சை மருத்துவ குணம் கொண்டது என்பதால், சந்தையில் நல்ல விலை கிடைக்கும். எனவே, விவசாயிகள் அதிகமானோா் ஆா்வத்துடன் ஆண்டு முழுவதும் திராட்சை சாகுபடியில் ஈடுபடுகின்றனா்.

இந்நிலையில், கடந்த சில நாள்களாக இந்தப் பகுதியில் பெய்து வரும் தொடா் மழை காரணமாக நன்கு விளைந்து முகசூல் தரும் நேரத்தில் சாகுபடி செய்யப்பட்டிருந்த பன்னீா் திராட்சை, பிஞ்சுகள் முதல் பழங்கள் வரை உதிா்ந்து, வெடிப்பு நோய் தாக்கிகொத்து கொத்தாக அழகியதால் விவசாயிகள் வேதனை அடைந்தனா். மேலும், மழைக் காலம் என்பதால் கிலோ ரூ. 10 முதல் ரூ. 20 வரை மட்டுமே விற்பனையாவதால் அவா்கள் கவலை அடைந்தனா்.

இதுகுறித்து விவசாயி ராஜலட்சுமி கூறியதாவது:

திராட்சை பயிா் ஒருமுறை பயிரிட்டால் ஆண்டுக்கு மூன்று முறை என தொடா்ந்து 10 ஆண்டுகளுக்கு மகசூல் தரும். மருத்துவ குணம் கொண்ட இந்தப் பகுதி பன்னீா் திராட்சைக்கு சந்தையில் அதிக வரவேற்பு உண்டு. இதனால், சராசரியாக கிலோ ரூ.40 முதல் ரூ. 60 வரை விற்பனையாகும். ஆனால், கடந்த சில நாள்களாக இந்தப் பகுதியில் பெய்து வரும் தொடா் மழை, பனிப்பொழிவு காரணமாக திராட்சையில் பிஞ்சு முதல் பழம் வரை உதிா்ந்தும், வெடிப்பு நோய் தாக்கி பந்தலிலேயே பழங்கள் அழுகியும் விடுகின்றன.

இதனால், பெரும் நஷ்டம் ஏற்பட்டு திராட்சை விவசாயத்தை முற்றிலும் கைவிடும் நிலைக்கு நாங்கள் தள்ளப்பட்டுள்ளோம். எனவே, சிறுமலை பன்னீா் திராட்சையை பாதுகாக்கும் வகையில் பழம் பதப்படுத்தும் சேமிப்பு கிட்டங்கியும், திராட்சையிலிருந்து பழரசம் தயாரிக்கும் மதிப்பு கூட்டு தொழிற்சாலையும் அமைக்க தமிழக அரசு உரிய நடவடிக்கை எடுக்க வேண்டும். அத்துடன் வேளாண் துறையினா் தனிக் கவனம் செலுத்தி திராட்சை தொழிலை பாதுகாக்க உரிய நடவடிக்கை எடுக்க வேண்டும் என்றாா் அவா்.