நீட் தேர்வில் மோசடி: '6 மாநிலங்கள்; ரூ.100 கோடி' - ஆள்மாறாட்டம் செய்த பொறியாளர் சிக்கியது எப்படி?

சமீபத்தில் நீட் தேர்வு முறைகேடு தொடர்பாக செய்திகள் வெளியாகின. இந்த மோசடி வடமாநிலங்களில் அதிக அளவில் நடக்கின்றன. அது போன்ற ஒரு மோசடியில் ஈடுபட்ட நபர் கைது செய்யப்பட்டுள்ளார்.

உத்தரப்பிரதேச மாநிலத்தில் மருத்துவம் படிக்க தனியார் மருத்துவக் கல்லூரியில் இடம் வாங்கித் தருவதாகக் கூறி ஏராளமானோரிடம் பணம் பெற்று மோசடி செய்திருப்பதாக ஏராளமானோர் புகார் செய்தனர். இப்புகார் தொடர்பாக போலீஸார் வழக்குப்பதிவு செய்து விசாரணை நடத்தி வந்தனர்.

இந்த விசாரணையில் நீட் தேர்வில் மோசடி, மருத்துவக் கல்லூரி அட்மிஷன் மோசடி போன்றவை தொடர்பாக அபினவ் சர்மா என்பவரை போலீஸார் லக்னோவில் கைது செய்தனர்.

அவரிடம் நடத்திய விசாரணையில் பல திடுக்கிடும் தகவல்கள் கிடைத்துள்ளன. சர்மா தனது அடையாளத்தை மாற்றி 5 பெயர்களில் வங்கிக் கணக்கு திறந்தது, வெளிநாடு சென்றது போன்ற காரியங்களில் ஈடுபட்டுள்ளார்.

ஐரோப்பா, வட அமெரிக்கா, தென்னமெரிக்கா, மத்திய ஆசியாவில் உள்ள 110 நாடுகளுக்கும் மேல் பயணம் செய்துள்ளார். மருத்துவம் படிக்க வேண்டும் என்று விரும்பும் பெற்றோரை அடையாளம் காண்பதற்காகவே நூற்றுக்கணக்கான ஏஜெண்டுகளை நியமித்து இருந்தார்.

மொத்தம் 6 மாநிலங்களில் இந்த ஏஜெண்டுகள் செயின் போன்று செயல்பட்டு வந்தனர். நீட் தேர்வில் ஆட்களை மாற்றி தேர்வு எழுத வைத்து பெரிய அளவில் மோசடி செய்துள்ளார். பி.டெக் முடித்துள்ள சர்மா மோசடி பணத்தில் ஆடம்பரமாக வாழ்ந்துள்ளது தெரிய வந்தது.

விமானத்தில் சென்றால் பிஸ்னஸ் வகுப்பில்தான் பயணம் செய்வார். ஹோட்டல்களில் தங்கினால் 7 நட்சத்திர ஹோட்டல்களில்தான் தங்குவார். ரூ. 2 லட்சத்திற்கு கண்ணாடி, பிளாட்டினம் கைக்கடிகாரம் என எப்போதும் ஆடம்பரமாக வாழ்வதையே வழக்கமாகக் கொண்டிருந்தார்.

டெல்லி, பெங்களூரு, கோவா, காட்மாண்டு, துபாய் போன்ற இடங்களில் பார்ட்டி நடத்துவதை வழக்கமாகக் கொண்டிருந்த சர்மாவிற்கு ஏராளமான பெண் நண்பர்கள் உண்டு. அவர்களுக்கு ரூ.5 முதல் 10 லட்சம் வரையிலான கிப்ட்களைக் கொடுப்பதுதான் சர்மாவின் வழக்கம் என்று போலீஸ் அதிகாரி கமலேஷ் தீக்‌ஷித் தெரிவித்தார்.

இது குறித்து அவர் மேலும் கூறுகையில், சர்மா ஆரம்பத்தில் டெல்லியைச் சேர்ந்த ஒரு நிறுவனத்தில் அட்மிஷன் தொடர்பான பணிகளைச் செய்து வந்தார். ஒரு ஆண்டில் அட்மிஷனில் உள்ள அனைத்து தகவல்களையும் தெரிந்து கொண்டு 2012ம் ஆண்டு சொந்தமாக அட்மிஷன் கன்சல்டன்சி நிறுவனத்தைத் தொடங்கினார்.

மருத்துவக் கல்லூரியில் சேர விரும்புபவர்களை அடையாளம் கண்டு அவர்களிடம் ரூ.18 முதல் 45 லட்சம் வரை வாங்கிக்கொண்டு பீகாரில் உள்ள பாரபங்கி, சிதாப்பூர் மருத்துவக் கல்லூரிகளில் அட்மிஷன் வாங்கிக்கொடுத்துள்ளார். சர்மா தனது நிகழ்ச்சிகளுக்கு பாலிவுட் நட்சத்திரங்களையும் அழைத்து வந்துள்ளார்.

சர்மா சிறையில் இருந்தபோது சந்தோஷ் என்பவனுடன் தொடர்பு ஏற்பட்டுள்ளது. சிறையில் இருந்துகொண்டே இருவரும் அட்மிஷன் மோசடியில் ஈடுபட்டுள்ளனர். அவர்கள் ரூ.100 கோடி அளவுக்கு மோசடி செய்துள்ளனர்'' என்று தெரிவித்தார்.

அவரது கூட்டாளி சந்தோஷும் கைது செய்யப்பட்டுள்ளார். உத்தரப்பிரதேசம், ராஜஸ்தான், மத்திய பிரதேசம் என அவரது மோசடி வலை 6 மாநிலங்களில் விரிவடைந்து இருந்தது. அவர்களது கூட்டாளிகளைக் கைது செய்ய தேவையான நடவடிக்கை எடுத்து வருவதாகவும், சில கல்வி நிறுவனங்களின் நிர்வாகிகளுக்கு இதில் தொடர்பு இருப்பதாகவும் போலீஸார் தெரிவித்தனர்.