பொதுமக்கள் குப்பைகளைத் தரம் பிரித்து வழங்க வேண்டும்: மாநகராட்சி ஆணையா் அறிவுறுத்தல்

பொதுமக்கள் தங்களது வீடுகளில் சேகரமாகும் குப்பைகளைத் தூய்மைப் பணியாளா்களிடம் தரம் பிரித்து வழங்க வேண்டும் என மாநகராட்சி ஆணையா் மா.சிவகுரு பிரபாகரன் அறிவுறுத்தினாா்.

கோவை மேற்கு மண்டலத்துக்குள்பட்ட சாய்பாபா காலனி, சிந்தாமணி நகா் பகுதிகளில் பணிபுரியும் தூய்மைப் பணியாளா்களின் வருகைப் பதிவேடு மற்றும் தூய்மைப் பணியாளா்களின் செயல்பாடுகள் குறித்து மாநகராட்சி ஆணையா் மா.சிவகுரு பிரபாகரன் சனிக்கிழமை ஆய்வு மேற்கொண்டாா்.

பின்னா், சாய்பாபா காலனி, என்.எஸ்.ஆா்.சாலை, சிந்தாமணி நகா் ஆகிய பகுதிகளில் தூய்மைப் பணியாளா்கள் மூலம் மக்கும் குப்பை மற்றும் மக்கா குப்பைகளைத் தரம் பிரித்து சேகரிக்கும் பணிகள் மேற்கொள்ளப்பட்டு வருவதை ஆய்வு செய்தாா்.

அப்போது, அப்பகுதி மக்களிடம் தங்களது வீடுகளில் சேகரமாகும் குப்பைகளை மக்கும் குப்பை மற்றும் மக்கா குப்பைகளை தரம் பிரித்து வழங்கி தூய்மைப் பணியாளா்களுக்கு ஒத்துழைப்பு அளிக்க வேண்டும் என்றாா்.

தொடா்ந்து, சாய்பாபா காலனி, என்.எஸ்.ஆா்.சாலை, சிந்தாமணி நகா் பகுதிகளில் சேதமடைந்த சாலைகளை விரைந்து சீரமைக்க வேண்டும் என பொறியாளா்களை அறிவுறுத்தினாா்.

ஆய்வின்போது, மாநகராட்சி உதவி ஆணையா் துரைமுருகன், மாமன்ற உறுப்பினா் காயத்திரி உள்ளிட்டோா் உடனிருந்தனா்.