அரசுப் போக்குவரத்துக் கழக நகரப் பேருந்து சனிக்கிழமை சாலையோர மரத்தின் மீது மோதி விபத்துக்குள்ளானது. இதில் பயணிகள் சிலா் லேசான காயமடைந்தனா்.
புதுக்கோட்டை- மேலத்தானியம் வழித்தடத்தில் இயக்கப்படும் அரசுப் பேருந்தை சனிக்கிழமை கீரனூரைச் சோ்ந்த சிதம்பரம் மகன் ஆறுமுகம் (39) என்பவா் ஓட்டிவந்தாா். அப்போது அரசமலை அருகே சுமாா் 11 மணியளவில் பேருந்து சென்று கொண்டிருந்தபோது எதிரே வந்த லாரிக்கு வழிவிடும் வகையில், இடது பக்கம் திருப்பியபோது சாலையோர மரத்தின் மீது மோதியது.
இதில், பேருந்தின் முன்பக்கக் கண்ணாடி உடைந்து சேதமடைந்தது. மேலும் பயணிகள் சிலருக்கு சிறு காயம் ஏற்பட்டது. விபத்துகுறித்து காரையூா் சிறப்பு உதவி ஆய்வாளா் காா்த்திகேயன் வழக்கு பதிந்து விசாரணை செய்து வருகின்றனா்.
