‘மழைக்காலங்களில் மின்மாற்றிகள் அருகே செல்லக் கூடாது’

மழைக் காலங்களில் மின் மாற்றிகள், மின் கம்பங்கள் அருகே செல்லக் கூடாது என தமிழ்நாடு அரசு மின் ஆய்வுத் துறை சாா்பில் அறிவுறுத்தப்பட்டுள்ளது.

இது தொடா்பாக, கோவை தெற்கு மின் ஆய்வாளா் ஆா்.சிவகுமாா் வெளியிட்டுள்ள செய்திக்குறிப்பு:

வடகிழக்கு பருவமழைக் காலங்களில் அறுந்து தரையில் கிடக்கும் மின்கம்பிகள், புதைவடங்களினால் மின் விபத்துகள் ஏற்பட வாய்ப்புள்ளன. எனவே, மழைக்காலங்களில் மின் மாற்றிகள், மின் கம்பங்கள், மின் பகிா்வுப் பெட்டிகள் மற்றும் ஸ்டே ஒயா்கள் ஆகியவற்றின் அருகே செல்லக் கூடாது.

மழையாலும், பெருங் காற்றாலும் அறுந்து விழுந்த மின்கம்பி அருகே செல்லக் கூடாது. மின்கம்பிகளுக்கு அருகில் உள்ள மரக்கிளைகளை வெட்டுவதற்கு மின்வாரிய அலுவலா்களை 94987 - 94987 என்ற எண்ணில் அணுக வேண்டும். மின்சார பெட்டி அருகே தண்ணீா் தேங்கி நிற்கும்போது, அதன் அருகில் செல்லக் கூடாது. உடனடியாக இதுதொடா்பாக மின்வாரிய அலுவலா்களுக்கு தகவல் தெரிவிக்க வேண்டும். மின்னல் ஏற்படும்போது வெட்ட வெளியில் நிற்கக் கூடாது. கான்கிரீட் கூரையிலான வீடு போன்ற பெரிய கட்டடங்களிலோ, பேருந்து, காா், வேன் போன்ற வாகனங்களிலோ தஞ்சம் அடையலாம்.

மழை நேரத்தில் மின்னல் ஏற்படும் சமயத்தில் வீட்டு உபயோக மின் சாதனங்கள் மற்றும் அலைபேசியைப் பயன்படுத்தக் கூடாது. மழைக் காலங்களில் வீடுகளில் மின் கசிவால் ஏற்படும் விபத்துகளைத் தடுக்க ஆா்சிசிபி மற்றும் ஆா்சிபிஓ எனப்படும் மின்கசிவுத் தடுப்பாண்களை பிரதான ஸ்விட்ச் போா்டுகளில் பொருத்த வேண்டும். மின்வாரிய ஒயரிங் வேலைகளை அரசு உரிமம் பெற்ற ஒப்பந்ததாரா் மூலமாக மட்டுமே மேற்கொள்ள வேண்டும். ஐ.எஸ்.ஐ. முத்திரை பெற்ற தரமான மின் சாதனங்களைப் பயன்படுத்த வேண்டும். குளியலறை, கழிப்பறை உள்ளிட்ட ஈரமான அறைகளில் சுவிட்சுகளைப் பொருத்தக் கூடாது. ஒவ்வொரு வீட்டிலும் சரியான நில இணைப்பு போடுவதுடன் அதனை குழந்தைகள் மற்றும் விலங்குகள் தொடாத வகையில் அமைத்து பராமரிக்க வேண்டும். வீட்டு உபயோக மின் சாதனங்களுக்கு 3 பின் உள்ள பிளக்குகள் மூலமே மின் இணைப்பு அளிக்க வேண்டும். மின்கம்பத்திலோ அவற்றைத் தாங்கும் கம்பிகளிலோ கால்நடைகளைக் கட்டக் கூடாது என தெரிவிக்கப்பட்டுள்ளது.