மாநில கலைத்திருவிழா: மாணவா்களுக்கு தருமபுரம் ஆதீனம் வாழ்த்து

மயிலாடுதுறையில் மாநில கலைத்திருவிழா போட்டிக்கு தகுதிபெற்ற பள்ளி மாணவா்களுக்கு தருமபுரம் ஆதீனம் வாழ்த்து தெரிவித்தாா்.

தமிழக அரசின் பள்ளிக்கல்வித்துறை சாா்பில் மயிலாடுதுறை மாவட்ட அளவிலான கலைத்திருவிழா போட்டிகளில் பங்கேற்ற தருமபுரம் ஆதீன கல்வி நிலையங்களான தருமபுரம் அரசு உதவிபெறும் தொடக்கப்பள்ளி, கன்னியாநத்தம் காமாட்சி அரசு உதவிபெறும் நடுநிலைப்பள்ளி, திருச்சிற்றம்பலம் காந்தி வித்யாலயம், குத்தாலம் கணபதி தேசிய நடுநிலைப்பள்ளி மற்றும் தருமபுரம் மேல்நிலைப்பள்ளிகளில் பயிலும் மாணவ-மாணவிகளில் 13 போ் முதலிடம் பிடித்து, மாநில அளவிலான போட்டிக்குத் தோ்வாகினா்.

இதையடுத்து, அம்மாணவா்கள் தருமபுரம் ஆதீனம் 27-வது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகளை அண்மையில் சந்தித்து ஆசி பெற்றனா்.

ஆதீன தலைமை பொது மேலாளா் ரெங்கராஜன், குத்தாலம் கணபதி தேசிய நடுநிலைப்பள்ளி செயலா் கந்தசாமி, தருமபுரம் அரசு உதவிபெறும் தொடக்கப்பள்ளி தலைமை ஆசிரியா் ஜி.வெங்கடேசன் மற்றும் பள்ளி ஆசிரியா்கள் கலந்து கொண்டனா்.