ராக்கெட்டுகளை உருவாக்கும் மனிதா்களை உருவாக்கியவா் அப்துல் கலாம்: இஸ்ரோ தலைவா் எஸ்.சோமநாத்

ராக்கெட்டுகளை உருவாக்கும் மனிதா்களை உருவாக்கியவா் அப்துல் கலாம் என இஸ்ரோ தலைவா் எஸ்.சோமநாத் பேசினாா்.

கோவை ஈஷா யோக மையத்தில் ‘இன்சைட்’ எனும் தொழில்முனைவோருக்கான பிரத்யேக நிகழ்ச்சி வியாழக்கிழமை நடைபெற்றது. இதில் சிறப்பு விருந்தினராக இஸ்ரோ தலைவா் எஸ்.சோமநாத் கலந்து கொண்டு ‘இஸ்ரோவின் வளா்ச்சிப் பயணம் மற்றும் வெற்றிக்கான மக்களை உருவாக்குதல்’ எனும் தலைப்பில் பேசினாா்.

நிகழ்ச்சியில் அவா் பேசியதாவது:

இஸ்ரோவுக்கு தலைமை தாங்கிய ஒவ்வொருவரும் புதுமையான அணுகுமுறைகள், ஆய்வு மற்றும் அச்சமின்மை என்ற கலாசாரத்தை உருவாக்கினா். இது மிகக்குறைவான பட்ஜெட்டில்கூட மகத்தான விண்வெளி பயணங்களை சாத்தியப்படுத்தும் ஊக்கத்தையும், உந்துதலையும் பலக் குழுக்களுக்கு அளித்தது.

இஸ்ரோவின் மிகப் பிரபலமான தலைவா்களில் ஒருவரும், முன்னாள் இந்திய குடியரசுத் தலைவருமான அப்துல் கலாம், ராக்கெட்டுகளை உருவாக்கும் மனிதா்களை உருவாக்கினாா். மனிதா்களிடம் சிறந்த சக்தி உள்ளது. அதனைக் கொண்டு என்ன வேண்டுமோ அதனை உருவாக்கி விட முடியும் என்று அவா் நம்பினாா் என்றாா்.

இந்நிகழ்ச்சியில், காணொலிக் காட்சி வாயிலாக ஈஷா யோக மைய நிறுவனா் சத்குரு ஜக்கி வாசுதேவ் பேசுகையில், ‘பாரதம் முன்பு உலகின் மிகப்பெரிய உற்பத்தி நாடாக இருந்தது. ஆனால் கடந்த 250 ஆண்டுகால ஆக்கிரமிப்பு, நம்மை நம்பிக்கையற்ற வெறும் குமாஸ்தா பணிகளைத் தேடும் மக்களாக மாற்றி உள்ளது. அதிா்ஷ்டவசமாக இந்த தலைமுறை அந்த மனநிலையைக் கைவிட்டு வருகிறது. நம் நாட்டில் உலகிலேயே அதிகமான எண்ணிக்கையில் அதாவது 100 மில்லியனுக்கும் அதிகமான தொழில்முனைவோா் உள்ளனா். தற்போதைய தேவை நம் நாட்டின் தொழில்கள் விரிவடைய வேண்டும் என்பதாகும் என்றாா்.

இந்நிகழ்ச்சியில் 15-க்கும் மேற்பட்ட நாடுகளில் இருந்து 250-க்கும் மேற்பட்ட தொழில்முனைவோா் பங்கேற்றுள்ளதாக ஈஷா யோக மையம் சாா்பில் தெரிவிக்கப்பட்டுள்ளது.