ஸ்ரீவில்லிபுத்தூர்: `பெண்ணை கடத்தி கூட்டுப் பாலியல் வன்கொடுமை' - 6 பேருக்கு ஆயுள் தண்டனை

விருதுநகர் மாவட்டம் அருப்புக்கோட்டை அருகே 43 வயது பெண் ஒருவர் 2022 ஆகஸ்ட் 22ஆம் தேதி மாலை விருதுநகரில் உள்ள உறவினர் வீட்டின் திருமண நிகழ்ச்சிக்குச் சென்றிருந்தார்.

திருமண நிகழ்ச்சி முடிந்து மாலையில் விருதுநகரில் இருந்து காரில் அருப்புக்கோட்டைக்குத் திரும்பிக் கொண்டிருந்தனர்.

பாலவநத்தம்–கோபாலபுரம் சாலையில் பயணித்துக் கொண்டிருந்தபோது, அந்தப் பெண் இயற்கை உபாதை கழிக்க காரிலிருந்து இறங்கியுள்ளார்.

அப்போது அங்கு வந்த 7 பேர் கொண்ட கும்பல், காரில் இருந்த முத்துச்செல்வத்தைக் கடுமையாகத் தாக்கிவிட்டு, அந்தப் பெண்ணைத் தங்களின் காரில் கடத்திச் சென்று காட்டுப் பகுதியில் கூட்டுப் பாலியல் வன்கொடுமை செய்துள்ளனர்.

பின்னர் அந்தப் பெண் அணிந்திருந்த 5 பவுன் நகை, பணம், செல்போன் உள்ளிட்டவற்றைப் பறித்துக் கொண்டு தப்பிச்சென்றுள்ளனர்.

இந்தச் சம்பவம் குறித்துப் பாதிக்கப்பட்ட பெண் போலீசில் புகார் அளித்துள்ளார்.

இது குறித்துத் தகவல் அறிந்த தென்மண்டல ஐஜி அஸ்ரா கார்க் உத்தரவின் பேரில், அப்போதைய விருதுநகர் எஸ்.பி. மனோகரன் மேற்பார்வையில் தனிப்படை அதிகாரிகள் தீவிர விசாரணை மேற்கொண்டனர்.

வழக்குப் பதிவு செய்த போலீசார், அந்தப் பகுதியில் பொருத்தப்பட்டிருந்த சிசிடிவி காட்சிகளை ஆய்வு செய்தனர். அருப்புக்கோட்டை தாலுகா போலீசார் தீவிர விசாரணை நடத்தி, கோவிலாங்குளத்தைச் சேர்ந்த சீனிவாசன், பேரையூர் பிரபாகர், விஜய், ராம்குமார், ஜெயக்குமார், கல்லூரி மாணவர் அழகுமுருகன் மற்றும் 16 வயது சிறுவன் ஆகிய 7 பேரையும் கைது செய்தனர்.

இந்த வழக்கில் சிறுவன் மீதான வழக்கு இளஞ்சிறார் நீதிமன்றத்தில் தனியாக நடைபெற்று வருகிறது.

மற்ற 6 பேர் மீதான வழக்கு ஸ்ரீவில்லிபுத்தூரில் உள்ள விரைவு மாவட்ட மகளிர் நீதிமன்றத்தில் விசாரணை நடைபெற்றது.

வழக்கின் இறுதி விசாரணையில், நீதிபதி புஷ்பராணி, சீனிவாசன், பிரபாகரன், விஜய், ராம்குமார், ஜெயக்குமார், அழகுமுருகன் ஆகிய 6 பேருக்கும் ஆயுள் சிறைத் தண்டனை மற்றும் ரூ.70,000 அபராதம் விதித்துத் தீர்ப்பளித்தார்.