"ஹைதராபாத் சாலைகளுக்கு 'Google, Meta, TCS' என பெயர் வைப்போம்" - தெலங்கானா CM ரேவந்த் சொல்வதென்ன?

உலகளாவிய பெருநிறுவனங்களின் முதலீடுகளை ஈர்ப்பதிலும், தொழில்நுட்பத் துறையில் பெரிய அளவில் வளர்ச்சியைக் கொண்டுவரவும் ஆந்திரா, தெலங்கனா மாநிலங்கள் போட்டிபோட்டு வருகின்றன.

சமீபத்தில் இந்தியாவின் தொழில்நுட்ப வளர்ச்சிக்குப் பங்களிக்கும் அடுத்த கட்ட பாய்ச்சலாக, சுமார் ₹1.25 லட்சம் கோடி ($15 Billion) வரை முதலீட்டில் கூகுளின் 'Google AI hub data centre'ஐ ஆந்திர மாநிலம், விசாகப்பட்டினத்தில் கட்டமைக்கும் ஒப்பந்தம் கையெழுத்தானது.

அதைத்தொடர்ந்து தெலங்கானா அரசும் தொழில்நுட்பத் துறையில் மிகப்பெரிய முதலீடுகளை கொண்டு வருவதில் தீவிரம் காட்டி வருகிறது.

அவ்வகையில் இன்று டெல்லியில் அமெரிக்கா - இந்தியாவிற்கு இடையேயான முதலீடுகள், தொழில்நுட்ப - பொருளாதாரா வளர்ச்சி சார்ந்த கொள்கை முடிவுகள், ஒப்பந்தங்களை தீர்மானிக்கும் 'USISPF' மாநாடு நடைபெற்றது.

இதில் தெலங்கானா அரசு, "2034 ஆம் ஆண்டுக்குள் மாநிலத்தின் பொருளாதாரத்தை 1 டிரில்லியன் டாலர்களாகவும், 2047 ஆம் ஆண்டுக்குள் 3 டிரில்லியன் டாலர்களாகவும் உயர்த்த இலக்கு நிர்ணயித்துள்ளதாக" உறுதி எடுத்திருக்கிறது.

டிசம்பர் 8-9 தேதிகளில் ஹைதராபாத்தில் மாநில அரசு, தெலங்கானா எழுச்சிக்கான உலகளாவிய உச்சி மாநாடு நடத்துவதையும் உறுதி செய்திருக்கிறது.

இந்த 'USISPF' மாநாட்டில் பேசியிருக்கும் தெலங்கானா முதல்வர் ரேவந்த் ரெட்டி, "30,000 ஏக்கர் பரப்பளவில் தொழில்நுட்பத்தில் மிகவும் மேம்பட்ட 'பாரத் ஃபியூச்சர் சிட்டி' ஹைதராபாத்தில் அமையவிருக்கிறது. அது இந்தியாவிலேயே மேம்பட்ட நகரமாக இருக்கும்.

இந்தியாவில் இருக்கும் சாலைகளுக்குப் பெரும்பாலும் அரசியல் தலைவர்களின் பெயர்களே வைக்கப்படுகின்றன. அந்த வழக்கத்தை மாற்றியமைத்து, ஹைதராபாத் சாலைகளுக்கு கூகுள், மெட்டா, டிசிஎஸ் (TCS) என போன்ற நிறுவனங்களின் பெயர்கள் வைக்கப்படும். இது ஹைதராபாத்தின் வளர்ச்சிக்கு உறுதுணையாக இருக்கும் நிறுவனங்களை கெளரவிக்கும் செயலாகும்" என்று கூறியிருக்கிறார்.

ஹைதராபாத் சாலைகளுக்கு கார்பரேட் நிறுவனங்களின் பெயர் வைக்கும் தெலங்கானா முதல்வர் ரேவந்த் ரெட்டியின் இந்த பெயர் மாற்ற திட்டம் பற்றிய உங்களின் கருத்தை கமெண்டில் தெரிவிக்கவும்.