Basics of Share Market 19: போர்ட்ஃபோலியோ என்றால் என்ன... அதை எப்படி கட்டமைக்க வேண்டும்?!

போர்ட்ஃபோலியோ - இந்த வார்த்தையை நாம் முன்னரே பார்த்திருக்கோம். நியாபகம் இருக்கிறதா? ஆம்...11-வது அத்தியாயத்தில் "நீங்கள் பங்குச்சந்தையில் என்னென்ன பங்குகள், பத்திரங்கள்...ஆகியவற்றில் முதலீடு செய்திருக்கிறீர்கள் என்ற லிஸ்டே போர்ட்ஃபோலியோ. இன்னும் எளிதாக புரிய சொல்ல வேண்டுமானால், பங்குச்சந்தை முதலீட்டின் பயோ டேட்டா, போர்ட்ஃபோலியோ" என்று பார்த்திருக்கிறோம்.

அதை தற்போது சற்று விரிவாக பார்க்கப்போகிறோம். இதை நாம் தெரிந்துகொண்டாலே நமது முதலீடுகள் எவ்வளவு பாதுகாப்பாக உள்ளது என்பதை தெரிந்துகொள்ளலாம்.

'முதலீடு செய்கிறோம்' என்று முடிவானதும், இஷ்டத்திற்கு பல நிறுவனங்களில் இருந்து பல பங்குகளை வாங்கி குவிக்காமல், முன்னர் சொன்ன ஆய்வுகளையும், இனி வரும் அத்தியாயங்களில் சொல்லப்போகும் ஆய்வுகளையும் செய்து உங்கள் லட்சியங்களுக்கு ஏற்ற மாதிரியான பங்குகளை வாங்குங்கள். ஒரு சூப்பர் மார்க்கெட்டிற்கு போகிறீர்கள் என்று வைத்துகொள்வோம். அரிசி தேவைப்படுகிறது என கடையில் இருக்கும் அத்தனை அரிசியையும் வாங்கமாட்டீர்கள் அல்லவா... அரிசி உங்களுக்கு தேவையான அளவு, பருப்பு உங்களுக்கு தேவையான அளவு, மஞ்சள் பொடி, மிளகாய் தூள் - இப்படி உங்களுக்கு தேவையானவற்றை தேவையான அளவு எடுத்து பாஸ்கேட் (Basket)-ல் போடுவீர்கள்.

அந்த பாஸ்கேட் தான் போர்ட்ஃபோலியோ. நீங்கள் பார்த்து பார்த்து வாங்கியிருக்கும் அரிசி, பருப்பு, மஞ்சள், மிளகாய் தூள் (அதாவது நிறுவனப் பங்குகள், கடன் பங்குகள், தங்கம், நிலம்) தான் பங்குகள். இந்த பாஸ்கேட்டில் இருக்கும் பொருட்களை வைத்து தான் நீங்கள் சமைக்கும் சமையல் ஆரோக்கியமாக இருக்கப்போகிறதா...இல்லையா என்பது முடிவாகப்போகிறது.

பிராக்கெட்டை பார்த்த உடன், என்னடா இது தங்கம், நிலம் எல்லாம் இருக்கிறது என்று நினைக்காதீர்கள். நீங்கள் எந்தவிதங்களில் காசை பெருக்க நினைத்திருக்கிறீர்களோ...பொருளையோ, சொத்தையோ சேர்த்திருக்கிறீர்களோ...அவை எல்லாமே போர்ட்ஃபோலியோவில் அடங்கும்.

போர்ட்ஃபோலியோ கட்டமைப்பு என்று வந்துவிட்டால், எத்தனை சதவிகிதத்தை எதில் முதலீடு செய்திருக்கிறீர்கள் என்பதை பார்க்க வேண்டும். 100 சதவிகித முதலீட்டையும் ஒரே விஷயத்தில் அதாவது தங்கம்/நிலம்/பங்கு என ஒன்றிலேயே செய்துவிடக் கூடாது. அந்த ஒன்று கவிழ்ந்தது என்றால் மொத்தமும் கவிழ்ந்தது தான். அதனால் ரிஸ்கை பொறுத்து உங்கள் முதலீடுகளை குறிப்பிட்ட சதவிகிதங்களாகப் பிரித்து முதலீடு செய்யுங்கள்.

அது எப்படி என்பதை நாளை பார்ப்போம்.

நாளை: முதலீடு செய்ய தெரிந்து கொள்ள வேண்டிய ஃபார்முலாக்கள்!