BB TAMIL 9: DAY 5: பிக் பாஸ் முன்னோர்களின் வரலாறு; இந்த வார சிறந்த போட்டியாளர்கள் இவர்களா?

ஒருவழியாக ஸ்கூல் டாஸ்க் முடிந்தது. சிறந்த டீச்சராக பிரஜினும் சிறந்த மாணவராக ரம்யாவும் தோவானது நியாயமானதாகத் தெரியவில்லை. எஃப்ஜேவும் வியானாவும் வேண்டுமென்றே மோசமாக ஆடி சிறைக்குள் ரொமான்ஸ் செய்ய திட்டமிட்டிருந்ததை சக போட்டியாளர்கள் கலைத்துப் போட்டார்களா?

பிக் பாஸ் வீட்டில் நடந்தது என்ன? -  நாள் 54

ஆரம்பத்திலேயே முந்தைய எபிசோடின் காட்சித் துண்டு ஒளிபரப்பானது. ஒருவேளை நாம்தான் எபிசோடை மாற்றிப் பார்க்கிறோமோ என்று சந்தேகம் வந்து விட்டது. அப்படியெல்லாம் இல்லை. என்றும் இல்லாத அதிசயமாக, முந்தைய நாள் காலையில் நடந்த ஒரு சிறிய சம்பவத்தைக் காட்டினார்கள். 

பார்வதியை நோண்டுவதென்றால் விக்ரமிற்குத் தனியான குஷி. சமையல் ஏரியாவில் ஒழுங்காக அடுக்கப்பட்டிருக்கும் பாத்திரங்களுக்கான கிரெடிட்டை பாருவிற்கு தராமல், "நான் சொல்லியதால்தான் பாரு செய்தார்; அந்தக் கிரெடிட் எனக்குத்தான்’ என்று பொதுவில் சொல்லப் போகிறேன்.. அதன் மூலம் பாரு காண்டாவார்… கன்டென்ட் கிடைக்கும்” என்கிற விளையாட்டை அமித்திடம் சொல்லிக் கொண்டிருந்தார் விக்ரம். இதை மற்றவர்களிடமும் சொல்லி பிளானைப் பக்காவாக ரெடி செய்திருந்தார். 

பெரும்பாலும் மற்ற போட்டியாளர்கள் தேமேவென்று உலவிக் கொண்டிருக்க விக்ரம் மட்டும்தான் எதையாவது யோசித்து வீட்டிற்குள் கலகம் நடக்க பிக் பாஸிற்கு உதவி செய்து கொண்டிருக்கிறார். 

விக்ரமின் பிராங்க்கை உடைத்துப் போட்ட பாரு

பொழுது புலர்ந்தது. “என்ன.. பாரு.. நான் சொன்ன மாதிரி எல்லா வேலையும் கரெக்ட்டா செஞ்சிட்ட போல. குட்.. கீப் இட் அப்” என்கிற மாதிரி விக்ரம் தனது பிராங்க்கை ஆரம்பிக்க, “என்ன வசந்திம்மா.. நாங்கள்லாம் சொன்னா செய்ய மாட்டீங்க.. விக்ரம் சொன்னா மட்டும் செய்யறீங்களா.. எங்க முன்னாடி பந்தா காட்டிட்டு அப்புறமா விக்ரம் கிட்ட பம்மறீங்க போல. இனிமே எங்களுக்கு எது வேணும்னாலும் விக்ரம் மூலமா கேட்டு வாங்கிக்கறோம்” என்று சாண்ட்ரா, சுபிக்ஷா உள்ளிட்ட மற்ற போட்டியாளர்களும் பாருவை வெறுப்பேற்ற முயன்றார்கள். 

காலையிலேயே கிச்சன் ஏரியாவில் ஒரு கலகம் உருவாகும். அதிலும் பாரு சம்பந்தப்பட்டது என்பதால் புயலே உருவாகும் என்று விக்ரம் திட்டமிட்டார். ஆனால் ‘நீ படிச்ச ஸ்கூல்ல நான் ஹெட்மாஸ்டர்’ என்கிற மாதிரி விக்ரமின் பிளானை அநாயசமாக உடைத்துப் போட்டார் பாரு. “அப்படி எல்லாம் இல்ல. தங்கம்.. சொல்லுங்க தங்கம்” என்று ‘அண்ணாத்த’ படத்தின் பிஜிஎம் மாதிரி வார்த்தைக்கு வார்த்தை ‘தங்கம்’ போட்டு மாணவர்களிடம் கூலாகப் பேசிக் கொண்டிருந்தார். ‘நம்ம பாருவா இது?’ என்று மற்றவர்களுக்கு ஆச்சரியமாக இருந்தது. 

ஒரு திரைப்படத்தின் நகைச்சுவைக் காட்சியில் செந்திலை அடிக்க முடியாதவாறு கவுண்டமணிக்குச் செய்வினை வைத்து விடுவார்கள். செந்திலை அடிக்க முடிவு செய்யும் போதெல்லாம் அது இயலாமல் கவுண்டமணி நொந்து போவார். அதைப் போல விக்ரமைப் பதிலுக்கு அடித்து நொறுக்க முடியாமல் பிக் பாஸ் வைத்த செய்வினை காரணமாக  (டாஸ்க் ரூல்) ஜென் மனநிலையில் இருக்க வேண்டிய கட்டாயத்திற்கு பாரு ஆளாகியிருக்கிறார்.

“போங்க தம்பி.. நாங்க எவ்வளவோ அடி வாங்கியிருக்கோம். இதெல்லாம் ஒரு அடியா?” என்று வடிவேலு மாதிரி விக்ரமை ஹாண்டில் செய்தார் பாரு. 

“கடவுளே.. இன்னியோட டாஸ்க் முடியுது. இன்னிக்கு ஒரு நாள் எனக்கு பொறுமையையும் நாக்கை அடக்கிப் பேசற வலிமையையும் கொடு.” என்று பல்லைக் கடித்துக் கொண்டு பிரார்த்தனைச் செய்தார் பாரு. 

‘குறுக்க இந்த கௌசிக் வந்தா’ - FJ ஹீரோ என்ட்ரி அலப்பறைகள்

பாருவை விக்ரம் நோண்டுகிறார் என்றால், விக்ரமை நோண்டி விளையாடுவதே வியானாவிற்குப் பிழைப்பாக இருக்கிறது. அமர்ந்திருந்த விக்ரம் மீது வியானா தண்ணீர் ஊற்றி விளையாட ‘அப்படியா.. தோ வரேன்’ என்று விக்ரமும் பதிலுக்கு வியானாவின் முகத்தில் தண்ணீரை ஊற்றினார். 

வியானாவிற்கு ஏதாவது பிரச்னை என்றால் ஹீரோ என்ட்ரி மாதிரி உடனே காப்பாற்ற வந்து விடுகிறார் FJ. “ஏன் விக்ரம் தண்ணி ஊத்தினீங்க.. பெட்டு நனையுதுல்ல” என்று கடுப்பாவதின் மூலம் மறைமுகமாகக் கோபத்தைக் காட்டினார். 

வியானாவின் அலப்பறை ஓவராக போனதால், “அவ ஸ்கூலுக்கு வந்தா நாங்க வரமாட்டோம்” என்று  மற்ற மாணவர்கள் ஆட்சேபம் செய்தனர். அதற்கு பிரின்சிபாலும் சம்மதம் தர, மறுபடியும் ஹீரோ என்ட்ரி. “ஒரு பிள்ளை தப்பு செஞ்சா ஸ்கூல்தானே கத்துக் கொடுக்கணும்” என்று வியானாவிற்கு ஆதரவாக வந்து நின்றார் FJ.

“வியானா ரொம்ப ஓவரா பண்றா. FJ எதுவுமே பண்ணாம சும்மா இருக்கான். என்ன காரணம்ன்னு  தெரியுமா.. வொர்ஸ்ட் ஃபொ்பார்மர்ன்னு பேரு வாங்கி ரெண்டு பேரும் ஜெயிலுக்குள்ள ஒண்ணா இருக்கலாம்ன்னு பிளான் பண்றாங்க” என்று அரோரா கொளுத்திப் போட “அட. இருக்குமோ?” என்று பின்பாட்டு பாடினார் சாண்ட்ரா.

சுபிக்ஷாவும் விக்ரமும் எதையோ பேசிக் கொண்டிருக்க நடுவில் தலையை நுழைத்து வேடிக்கை காட்டினார் வியானா. இதனால் விக்ரம் எரிச்சலாகி “இதான் க்யூட்டா.. வெங்காயம். பெரிய இவளா நீ?” என்று உண்மையாகவே திட்ட மறுபடியும் ஹீரோ என்ட்ரி. “அவ சேட்டை பண்றாதான். ஆனா அதுக்காக இப்படியெல்லாம் திட்ட வேணாம் தங்கம்” என்று மறைமுகமாக எச்சரித்தார் FJ. (தங்கம்ன்ற வார்த்தை பாரு கிட்ட இருந்து கடன் வாங்கியதா?!)  “நானா ஏதோ யோசிச்சு எதையோ பண்றேன். அதைக் கூட ஸ்பாயில் பண்ணணுமா?” என்பது விக்ரமின் கோபம். 

பிக் பாஸ் முன்னோர்களின் வரலாறு அறிந்த மாணவர்கள்

பள்ளியில் இன்பச் சுற்றுலா அழைத்துச் செல்கிறார்களாம். ஏற்காடோ, குணசீலமோ என்று பார்த்தால் இல்லை. பக்கத்தில் இருக்கும் மியூசியம். அங்கு பிக் பாஸ் வரலாற்றின் முன்னோர்களின் புகைப்படங்களும் அவர்கள் செய்த சாதனைகளும் கல்வெட்டில் பொறித்து வைக்கப்பட்டிருக்கிறதாம். ஆசிரியர்கள் அந்தச் சாதனைகளை மாணவர்களுக்கு விளக்கி சொல்ல வேண்டுமாம். 

பீட்ரூட்டைக் கலந்து உப்புமா போன்றதொரு வஸ்துவைக் கிளறி வைத்திருந்தார் செஃப் பாரு. அதைச் சாப்பிட முடியாமல் மாணவர்கள் நிறைய அவஸ்தைப் பட்டார்கள். ஆம்லேட் துணையிருந்தால்தான் உள்ளே தள்ள முடியும் என்கிற நிலைமை. “நெஜம்மாவே குமட்டுது. என்னால முடியல” என்று புலம்பிய விக்ரம், உணவை வேஸ்ட் செய்யக்கூடாது என்பதற்காக விழுங்கி விட்டு பிறகு வாந்தியெடுத்தார். (இனிமே பாருவை கிச்சன்ல சோ்ப்பீங்க?!)

இன்பச் சுற்றுலாவிற்கு அனைவரும் கிளம்பினார்கள். குறும்புகள் செய்த வியானா மட்டும் அனுமதிக்கப்படவில்லை. மியூசியத்திற்குள் இருந்த புகைப்படங்களை முந்தைய பிக் பாஸ் சீசன் என்று நேரடியாகச் சொல்லாமல் 2024 பேட்ச், 2020 பேட்ச் என்று பள்ளியுடன் தொடர்புப்படுத்தி பேசினார்கள். 

போட்டியில் ஜாக்குலின் தோற்று அழுதது, ஜூலிக்கு ரெட் கார்ப்பரேட் விரிக்கிறேன் என்கிற பெயரில் ஓவியா செய்த அநியாயக் குறும்பு, தாடி பாலாஜியின் தலையில் குப்பையைக் கொட்டிய ஐஸ்வர்யா என்று சரித்திரத்தின் பழைய பக்கங்கள் புரட்டப்பட, அந்தச் சம்பவங்களையெல்லாம் விளக்கிக் கொண்டிருந்தார் கனி. ஏதோ சுதந்திரப் போராட்ட தலைவர்களின் வரலாற்றை அறிவது போல உற்சாகமாக மாணவர்கள் கேட்டுக் கொண்டிருந்தார்கள். 

நீச்சல் குளத்தில் அரை நிர்வாணமாக குளித்து கொண்டிருந்த வினோத், எல்லோரும் திரும்பி வந்த போது கூச்சப்பட்டு வீட்டுக்குள் குடுகுடுவென்று ஓடினார். ‘பார்த்து வழுக்கிடப் போகுது’ என்று எச்சரித்தார் சுபிக்ஷா. கருநாக்கு. சொன்னது போலவே தடால் என்று விழுந்து மண்டையிலும் கையிலும் அடிபட்டுக் கொண்டார். (விழுந்துட்டாரு ஒருத்தரு.. காப்பாத்தணும் கர்த்தரு!)

சிறந்த இடமாக ஸ்கூலைத் தோ்வு செய்த மாணவர்கள் - கடுப்பான பாரு

குழந்தைகளை அதட்டாமல் மிரட்டாமல் Gentle Teaching நடத்த வேண்டுமாம். இ்ந்த நோக்கில் மாணவர்களுக்குப் பிடித்த இடமாக எது இருந்தது…. ஸ்கூலா அல்லது ஹாஸ்டலா என்று ஒவ்வொரு மாணவரும் சொல்ல வேண்டும்.

சொல்லி வைத்தாற் போல அனைவருமே ஸ்கூல் என்று சொல்ல, பாருவின் முகம் வழக்கம் போல் அஷ்ட கோணலாகியது. ‘இவிய்ங்களுக்கு வடிச்சுக் கொட்டி என்ன புண்ணியம்?’ என்பது போல் முகத்தை வைத்துக் கொண்டார். ‘பொண்ணுங்களையும் பையங்களையும் தனியா பேச விட்டாங்க.. நல்ல டீச்சர்ஸ்’ என்று கம்ருதீன் ரொமான்ஸ் காரணம் சொல்ல சபை கலகலத்தது. பாருவின் முகம் கடுப்பாகியது. க்ரூப் போட்டோ எடுத்தவுடன் இந்த டாஸ்க் முடிந்தது. (ஹப்பாடா!)

இந்த டாஸ்க்கிற்காக தங்களை மாற்றிக் கொண்ட போட்டியாளர்களை பிக் பாஸ் பாராட்டினார். குறிப்பாக பாய்ஸ்களின் மேக் ஓவர் நன்றாக இருந்ததாம். 

மக்களின் பார்வையில் யார் சிறந்த மாணவராக இருக்கக்கூடும்? என்கிற கேள்விக்கு ஆசிரியர்கள் பதில் சொல்ல வேண்டும். மற்ற மாணவர்களை விடவும் விக்ரம் ஏதோதோ ஐடியா செய்து டாஸ்க்கை நகர்த்திச் சென்றார். பணிவான மாணவனாகவும் இருந்தார். நியாயப்படி அவர்தான் பெஸ்ட் சாய்ஸாக வந்திருக்க வேண்டும்? ஆனால்?..

சிறந்த போட்டியாளர்களாக ரம்யா மற்றும் பிரஜின் - நியாயமான தேர்வா?

“எனக்கு என் பெயரைக்கூட எழுதவோ வாசிக்கவோ தெரியாது. இங்க வந்துதான் அதைக் கத்துக்கிட்டேன். நாலைஞ்சு திருக்குறள் சொல்ற அளவுக்கு முன்னேற்றம் வந்துடுச்சு” என்று ரம்யா சென்டியாக சொன்ன காரணத்தை வைத்து அவரையே best performer-ஆக தேர்வு செய்தார்கள். விக்ரமை பிடிக்காதவர்களின் வாக்குகளும் இதற்கு காரணமாக இருக்கலாம். 

அடுத்ததாக மாணவர்கள் சிறந்த டீச்சரை தோ்ந்தெடுக்க வேண்டும். இதற்குப் பொருத்தமானவராக கனி அல்லது அமித் ஆகிய இருவரில் ஒருவர்தான் வந்திருக்க வேண்டும். பிரின்சிபல் பிரஜின் சும்மாதான் உலவிக் கொண்டிருந்தார். ஆனால் இவருக்கும் அதே சென்டிமென்ட் காரணம். கடந்த வாரத்தில் கோபமாக இருந்தவர் இந்த வாரத்தில் மனம் திருந்தி சாந்தமாக மாறி விட்டாராம். சாண்ட்ரா கூட பிரஜினையே தோ்ந்தெடுத்தார். (நாங்க தனியாத்தான் ஆடறோம்!) 

ஆக சிறந்த போட்டியாளர்களாகத் தோ்ந்தெடுக்கப்பட்ட ரம்யாவும் பிரஜினும் அடுத்த வாரத்தின் ‘தல’ போட்டியில் பங்கேற்பார்கள். 

மணி கோக்கும் தண்டனையில் வினோத்தைக் கோத்து விட்ட போட்டியாளர்கள்

அடுத்தது வொர்ஸ்ட் பெர்ஃபாமன்ஸ். FJ எதிர்பார்த்தது மாதிரியே அவரது பெயரையே பலரும் சொன்னார்கள். ‘அடடா.. தங்களின் ரொமான்ஸ் பிளான் சக்ஸஸ்’ என்று FJ  உள்ளுக்குள் மகிழ்ந்திருக்கலாம். ஆனால் இதை அறிந்து கொண்ட சக போட்டியாளர்கள் அதற்கு ஆப்பு வைத்தார்கள்.

மோசமாக ஆடிய வியானாவை தேர்ந்தெடுக்காமல் வம்படியாக வினோத்தின் பெயரை வரிசையாகச் சொன்னார்கள். ‘நான் பாட்டுக்கு சிவனேன்னுதாண்டா இருந்தேன்’ என்று நொந்து போனார் வினோத். பிறகு காமிரா முன்பு வந்து “நான் டாஸ்க் நல்லாத்தான் பண்ணேன். சதி பண்ணி உள்ளே அனுப்புறாங்க’ என்று புலம்பினார். 

சிறைத் தண்டனை போதாது என்று இருவருக்கும் மணி கோக்கும் வேலையையும் தந்தார் பிக் பாஸ். இது ஒரிஜினலாக FJ மற்றும் வியானாவிற்காக யோசிக்கப்பட்டதா என்று தெரியவில்லை. வியானாவிற்குப் பதிலாக வினோத்தை மக்கள் கோத்து விட்டதின் குறியீடு இது. இந்த அறிவிப்பை வாசிக்கும் போது விழுந்து விழுந்து சிரித்து ரசித்துப் படித்தார் பாரு. (மத்தவங்களுக்குப் பிரச்னைன்னா அத்தனைச் சந்தோஷம்!)

அடுத்ததாக ஐஸ்கிரீம் விளம்பரம். தனக்குப் பிடித்த போட்டியாளரைத் தேர்வு செய்து அவரது குணாதிசயங்களுக்கு ஏற்ற கலவையுடன் ஐஸ்கிரீம் பரிசளிக்க வேண்டுமாம். இதிலும் பிரஜினைத் தோ்ந்தெடுத்து அழும்பு செய்தார் சாண்ட்ரா. கோபமாக இருந்தவர் மாறி விட்டாராம். (முடியல!). 

அரோராவும் கம்முவும் பரஸ்பரம் தேர்வு செய்து பாருவை வெறுப்பேற்றினார்கள். காண்டான பார்வதி, ‘இருங்கடா.. நானும் பதிலுக்குப் பண்றேன்” என்று சபரியை நோக்கி வண்டியை ஓட்ட, “என்னடா.. இது சபரிக்கு வந்த சோதனை?” என்று அவர் திகைத்துப் போனார்.

அமித்தும் வியானாவும் ‘தங்க மீன்கள்’ படத்தின் ரேஞ்சிற்கு ஆனந்த யாழை மீட்டினார்கள். இறுதியில் சிறந்த தோ்வாக அரோரா மற்றும் சாண்ட்ரா இருந்ததாகச் சொல்லப்பட்டது. 

“அரோரா எனக்கு நிறைய அட்வைஸ் பண்றா.. நீ போய் அமித் கிட்ட பாட்டு பாடு.. வினோத் கிட்ட போய் ஜாலியா பேசு.. உனக்கு சிவகார்த்திகேயன் மாதிரி வர்ற அளவுக்கு திறமை இருக்கு. அப்படின்னு மோட்டிவேட் பண்ணிட்டே இருக்கா. ஆனா பாரு இருக்காளே.. எப்பப்பாரு ஒரே புறணி.. இவன் என்னைக் கிள்ளிட்டான்… அவன் என்னை அடிச்சிட்டான்னு வம்பு பேசறா.. அவ கிட்ட இருந்தா என்னால உருப்பட முடியாது போல இருக்கு” என்று விக்ரமிடம் அனத்திக் கொண்டிருந்தார் கம்ருதீன். (இப்பவாவது திருந்தினா சரி!)