Biggboss Tamil: 'டிஜிட்டல் அரஸ்ட்; போதை வஸ்து, சிபிஐ' - சவுந்தர்யாவிடம் பண மோசடி; போலீஸ் சொல்வதென்ன?

நாடு முழுவதும் நடக்கும் கொரியர் மோசடி, ஆன்லைன் டிரேடிங் மோசடி ஆகியவற்றில் சிக்கி ஏராளமானவர்கள் பணத்தை இழந்து வருகின்றனர். இதுதொடர்பாக வழக்குகள் பதிவாகி கைது படலங்களும் நடந்து வருகின்றன. இந்நிலையில், பிக்பாஸ் நிகழ்ச்சியில் பங்கேற்றுள்ள சின்னத்திரை நடிகை சவுந்தர்யா, இந்த மோசடி கும்பலிடம் சிக்கி 17.50 லட்சம் ரூபாயை இழந்திருக்கும் தகவல் வெளியாகியுள்ளது.

இதுகுறித்து சைபர் க்ரைம் போலீஸார் கூறுகையில், "கடந்த ஆகஸ்ட் மாதம் 27ஆம் தேதி நடிகை சவுந்தர்யா, சூளைமேட்டில் உள்ள தனது வீட்டில் தங்கியிருந்தபோது அவருக்கு ஒரு போன் அழைப்பு வந்திருக்கிறது. அதில் பேசியவர், பெடக்ஸ் கொரியர் நிறுவனத்திலிருந்து பேசுவதாகவும் உங்களுடைய பெயருக்கு அனுப்பப்பட்ட பார்சலில் பாஸ்போர்ட், போதைப் பொருள் உள்ளிட்டவை இருப்பதாகவும் கூறியிருக்கிறார். அதற்கு எனக்கும் அந்தப் பார்சலுக்கும் எந்தவித தொடர்பும் இல்லை என நடிகை சவுந்தர்யா கூறியிருக்கிறார்.

அதன்பிறகு சி.பி.ஐ அதிகாரி என்று அறிமுகப்படுத்திக் கொண்டு இன்னொரு நபர் சவுந்தர்யாவிடம் மிரட்டும் தொனியில் பேசியிருக்கிறார். அப்போது அந்த அதிகாரி, ஸ்கைப் கால் மூலம் சவுந்தர்யாவைத் தொடர்பு கொண்டு உங்களை டிஜிட்டல் அரஸ்ட் செய்திருப்பதாகக் கூறினார். அதனால், அதிர்ச்சியடைந்த நடிகை சவுந்தர்யா, தனக்கும் போதைப் பொருளுக்கும் எந்தவித தொடர்பும் இல்லை எனக் கூறியிருக்கிறார். 'உங்களின் வங்கிக் கணக்குக்குப் போதைப் பொருள் கடத்தல் கும்பலிடமிருந்து லட்சக்கணக்கான பணம் வந்ததற்கான ஆதாரம் இருக்கிறது. அதுதொடர்பாக சி.பி.ஐ வழக்குப்பதிவு செய்திருக்கிறது. அந்த ஆவணத்தையும் ஆர்.பி.ஐ ஆவணத்தையும் உங்களுக்கு அனுப்பி வைக்கிறேன்' என சி.பி.ஐ அதிகாரி போலப் பேசியவர் சவுந்தர்யாவினடம் தெரிவித்திருக்கிறார்.

பின்னர் சவுந்தர்யாவின் வாட்ஸ்அப் நம்பருக்கு அந்த சி.பி.ஐ அதிகாரி ஆவணங்களையும் அனுப்பி வைத்திருக்கிறார். அதைப் பார்த்த சவுந்தர்யா, சி.பி.ஐ அதிகாரி சொல்வதை நம்பத் தொடங்கியிருக்கிறார். பின்னர் அந்த சி.பி.ஐ அதிகாரி, நான் சொல்லும் வங்கிக் கணக்குகளுக்கு உங்கள் வங்கி கணக்கிலிருக்கும் பணத்தை அனுப்பி வையுங்கள். அவற்றை ஆய்வு செய்துவிட்டு மீண்டும் உங்களின் வங்கிக் கணக்குக்கே அந்தப் பணத்தை அனுப்பி வைத்து விடுகிறேன் என்று கூறியிருக்கிறார். அதை நம்பிய சவுந்தர்யாவும், சி.பி.ஐ அதிகாரி கூறிய வங்கிக் கணக்குகளுக்கு 12 தவனையாக ரூ.17.50 லட்சத்தை அனுப்பி வைத்திருக்கிறார். அந்தப் பணத்தைப் பெற்றுக் கொண்ட சி.பி.ஐ அதிகாரி, தன்னுடைய செல்போன் நம்பரை சுவிட்ச் ஆப் செய்துவிட்டு எஸ்கேப் ஆகிவிட்டார்.

அதன்பிறகே சவுந்தர்யா, தான் ஏமாற்றப்பட்டதை உணர்ந்து சென்னை மேற்கு மண்டல சைபர் க்ரைம் பிரிவில் புகாரளித்தார். அதன்பேரில் விசாரணை நடத்தி வருகிறோம். நடிகை சவுந்தர்யா அனுப்பிய பணம் குஜராத், மும்பை, அசாம், மைசூர் உள்ளிட்ட மாநிலங்களில் உள்ள வங்கிக் கணக்குகளுக்குச் சென்றிருப்பது தெரியவந்திருக்கிறது. அந்த பணத்தை மீட்டெடுப்பதோடு, சம்பந்தப்பட்ட சைபர் க்ரைம் மோசடி கும்பலைப் பிடிக்க நடவடிக்கை எடுத்து வருகிறோம்" என்றனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/2b963ppb