Doctor Vikatan: காலையில் வெறும் வயிற்றில் நெய் எடுத்துக்கொள்வது ஆரோக்கியமானதா?

Doctor Vikatan: என்னுடைய தோழி, தினமும் காலையில் வெறும் வயிற்றில் நெய் எடுத்துக்கொள்வதை வழக்கமாக வைத்திருக்கிறாள். அது உடலுக்கு மிக நல்லது என்கிறாள். நெய் என்றாலே கொழுப்பு என்று கேள்விப்பட்ட எனக்கு இது அதிர்ச்சியாக இருக்கிறது.  தினமும் காலையில் நெய் எடுப்பது சரியானதா?

பதில் சொல்கிறார் சென்னையைச் சேர்ந்த ஊட்டச்சத்து ஆலோசகர் நிரோஷா.

தினமும் காலையில் ஒரு டேபிள்ஸ்பூன் அளவு நெய் எடுத்துக்கொள்வது மிகவும் நல்லது. நெய்யில் நிறைய நல்ல தன்மைகள் உள்ளன. தினமும் காலையில் வெறும்வயிற்றில் ஒரு டேபிள்ஸ்பூன் நெய் எடுத்துக்கொள்வது செரிமானத்துக்கு உதவும். செரிமானத்துக்கான அமிலங்கள் வயிற்றில் சுரந்து, அன்றைய நாள் முழுவதும் எடுத்துக்கொள்ளும் உணவுகளின் ஊட்டச்சத்துகள் உட்கிரகிக்கப்படவும், உணவு நன்கு செரிமானமாகவும் நெய் உதவும். நெய்யில் மீடியம் செயின் டிரைகிளிசரைடு அமிலம் இருப்பதால், அது உடலுக்கு உடனடி ஆற்றலைக் கொடுக்கும். அந்த எனர்ஜியானது அந்த நாள் முழுவதும் தொடரும். 

எடைக்குறைப்பு முயற்சியில் இருப்போருக்கும் நெய் உதவும். 'என்னது.... நெய் எடுத்துக்கிட்டா எடை குறையுமா...' என நீங்கள் ஆச்சர்யப்படலாம். உண்மைதான்.ஆரோக்கியமான எந்த உணவையும் அளவோடு எடுத்துக்கொள்ளும்போது ஏராளமான நன்மைகள் உள்ளன. அது நெய்க்கும் பொருந்தும்.  நெய்யில் உள்ள ஆரோக்கிய கொழுப்பு, நம் ஹார்மோன்களின் சமநிலைக்கு உதவும். தினமும் அளவோடு நெய் எடுத்துக்கொள்ளும்போது அனாவசிய உணவுத் தேடல் குறையும். அதன் மூலம் எடைக்குறைப்பு சாத்தியமாகும்.

இன்றைய சூழலில் பலருக்கும் மலச்ச்சிக்கல் பிரச்னை இருப்பதைப் பார்க்கிறோம். தினமும் காலையில் எடுத்துக்கொள்ளும் ஒரு டேபிள்ஸ்பூன் நெய், மலத்தை இளக்கி, குடல் அசைவுகளைச் சீராக்கி, மலச்சிக்கல் பிரச்னையிலிருந்து விடுதலை தரும். 

சருமத்தின் அழகுக்கும் ஆரோக்கியத்துக்கும்கூட நெய் மிகவும் நல்லது. நெய்யில் வைட்டமின் ஏ, டி, ஈ, கே, ஆன்டி ஆக்ஸிடன்ட்டுகள் இருப்பதால் சரும நிறமும் பளபளப்பும் கூடும். முதுமைத்தோற்றம் தள்ளிப்போகும்.  உடலை நச்சுநீக்கம் செய்வதற்கென டீடாக்ஸ் ஜூஸ் போன்றவற்றை பலர் எடுத்துக்கொள்கிறார்கள்.  அவற்றுக்கு பதிலாக நெய் எடுத்துக்கொண்டால், அது உடலை இயற்கையாக டீடாக்ஸ் செய்யும். உடலின் தேவையற்ற நச்சுகள், கழிவுகள் வெளியேறும். உடலின் நோய் எதிர்ப்பாற்றலை மேம்படுத்தவும் நெய் உதவும்.  நெய்யில்  இத்தனை நல்ல தன்மைகள் உள்ளதால் தினமும் அளவோடு அதைச் சேர்த்துக்கொள்வது மிகவும் ஆரோக்கியமானது.

உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.