Rohit Sharma: ``ஆஸ்திரேலியா சவாலான அணியாக இருக்க காரணம்...'' - ஆஸ்திரேலிய நாடாளுமன்றத்தில் ரோஹித்

இந்தியா மற்றும் ஆஸ்திரேலியா அணிகளுக்கிடையிலான பார்டர் கவாஸ்கர் டிராபி டெஸ்ட் தொடர் ஆஸ்திரேலியாவில் நடைபெற்று வருகிறது. இதில், பெர்த் மைதானத்தில் நடைபெற்ற முதல் டெஸ்டில் பும்ரா தலைமையிலான இந்திய அணி 295 ரன்கள் வித்தியாசத்தில் அபார வெற்றி பெற்றது. தனக்கு குழந்தை பிறந்ததால் முதல் டெஸ்ட்டில் பங்கேற்காத ரோஹித் சர்மா, அடிலெய்டில் இரண்டாவது டெஸ்ட் தொடங்குவதற்கு முன்பாக ஆஸ்திரேலியா சென்றடைந்திருக்கிறார்.

2-வது டெஸ்ட் முதல் மீதமிருக்கும் போட்டிகளில் இந்திய அணியை இவரே வழிநடத்துவார் என்று ஏற்கெனவே அறிவிக்கப்பட்டிருந்தது. இந்த நிலையில், ஆஸ்திரேலிய பிரதமர் அந்தோணி அல்பானீஸ் நேற்று இந்திய வீரர்களுக்குப் பிரதமர் மாளிகையில் விருந்தளித்தார். அதைத்தொடர்ந்து அந்நாட்டு நாடாளுமன்றத்தில் இந்திய கேப்டன் ரோஹித் சர்மா உரையாற்றினார்.

அந்த உரையில் ரோஹித் சர்மா, ``விளையாட்டு மற்றும் வர்த்தகத்தில் இந்தியாவுக்கும் ஆஸ்திரேலியாவுக்கும் நீண்ட உறவு உள்ளது. நாங்கள் இங்கு மகிழ்ச்சியாக கிரிக்கெட் விளையாடியிருக்கிறோம். ரசிகர்களின் ஆர்வத்தாலும், பிளேயர்ஸின் போராட்ட குணத்தாலும் ஆஸ்திரேலியா ஒரு சவாலான அணியாக இருக்கிறது. உலகின் தலைசிறந்த அணிக்கெதிராக களமிறங்குவது மகிழ்ச்சியளிக்கிறது. அதேசமயம் ஆஸ்திரேலியாவில் நாங்கள் வெற்றி இலக்கை அடைந்திருக்கிறோம்.

சமீபத்தில் ஒரு டெஸ்ட் போட்டியில் வெற்றி பெற்றிருக்கிறோம். அந்த வேகத்தை நாங்கள் மேலும் முன்னோக்கி எடுத்துச் செல்ல விரும்புகிறோம். மீதமுள்ள போட்டிகளில் இருநாட்டு ரசிகர்களையும் மகிழ்விப்போம். நாங்கள் சிறப்பான ஆட்டத்தை வெளிப்படுத்துவதை எதிர்நோக்குகிறோம். அதேசமயம் இந்த நாட்டையும் ரசிக்கிறோம். மேலும், இங்கிருப்பதில் மகிழ்ச்சி அடைகிறோம். எங்களை இங்கு அழைத்ததற்கு நன்றி." என்று கூறினார்.

டிசம்பர் 6-ம் தேதி அடிலெய்டில் நடைபெறும் இரண்டாவது டெஸ்ட் பகல்-இரவு ஆட்டமாக நடைபெறும் என்பது குறிப்பிடத்தக்கது.