Sambhal Violence: "அமைதியும் நல்லிணக்கமும் வேண்டும்" - மசூதி ஆய்வை நிறுத்த உச்ச நீதிமன்றம் உத்தரவு!
Admin
- 1 hours ago
உத்தரப்பிரதேசம் மாநிலம் சம்பாலில் மசூதி இருக்கும் இடத்தில் முன்னதாக இந்து கோயில் இருந்ததாக இந்து மத அமைப்புகளைச் சேர்ந்தவர்கள் நீதிமன்றத்தில் மனு அளித்துள்ளனர். விசாரணை நீதிமன்றம் இந்த மனுக்கள் அடிப்படையில் சம்பாலில் உள்ள ஷாஹி இத்கா மசூதியில் ஆய்வு நடத்த உத்தரவிட்டிருந்து.
இந்த நிலையில் உச்ச நீதிமன்றம் இன்று, விசாரணை நீதிமன்ற தீர்ப்பின் அடிப்படையில் ஆய்வுப்பணிகள் எதுவும் மேற்கொள்ளப்படக் கூடாது என தீர்ப்பளித்துள்ளது.
அமைதி மற்றும் நல்லிணக்கத்தைப் பேணுமாறு வலியுறுத்திய உச்ச நீதிமன்றம், மசூதி நிர்வாக கமிட்டி அலாகாபாத் உயர் நீதிமன்றத்தை மேல்முறையீட்டுக்கு அணுகுமாறு தெரிவித்துள்ளது.
உச்ச நீதிமன்ற தலைமை நீதிபதி சஞ்சிவ் கண்ணா, "அமைதியும் நல்லிணக்கமும் உறுதிசெய்யப்பட வேண்டும். நாங்கள் இதை நிலுவையில் வைத்திருப்போம். நாங்கள் நடுநிலையுடன் இருக்கவும், விரும்பத்தகாத எதுவும் நடைபெறாமல் இருப்பதை உறுதி செய்யவும் விரும்புகிறோம்" என்று தெரிவித்துள்ளார்.
அலகாபாத் நீதிமன்றம் மசூதி நிர்வாக கமிட்டி மனு அளித்த மூன்று நாட்களுக்குள் விசாரணை நடத்த வேண்டும் என உச்ச நீதிமன்றம் உத்தரவிட்டுள்ளது. விசாரணை நீதிமன்றம் ஜனவரி 8ம் தேதிக்கு ஒத்திவைத்துள்ள விசாராணையை அலகாபாத் நீதிமன்ற தீர்ப்பு வரும்வரை நடத்தக் கூடாது என்றும் உச்ச நீதிமன்றம் அறிவுறுத்தியிருக்கிறது.
Sambhal Violence: 5 பேர் மரணம், காவலர்கள் காயம்!
விசாரணை நீதிமன்ற உத்தரவு சம்பால் பகுதியில் வன்முறை வெடிக்க காரணமாக அமைந்தது. மசூதியை ஆய்வு செய்ய "அட்வகேட் கமிஷனர்" தலைமையில் ஆய்வு குழு மசூதிக்குள் நுழைந்தபோது அங்கு பொதுமக்கள் கூடியதால் சலசலப்பு ஏற்பட்டது.
மக்கள் கூடி காவல்துறையினர் மற்றும் பிற அதிகாரிகள் மசூதிக்குள் நுழைவதைத் தடுத்துள்ளனர். காவல்துறையினர் மற்றும் அங்கு கூடிய கும்பல் இடையே மோதல் எழுந்துள்ளது. மோதலில் ஈடுபட்டவர்கள் கற்களை எறிந்ததாகவும் வாகனங்களுக்கு தீ வைத்ததாகவும் கூறப்படுகிறது, இந்த வன்முறையில் 20 காவல்துறையினர் காயமடைந்துள்ளனர். மோதலில் ஈடுபட்ட 5 பேர் மரணமடைந்ததாக இந்தியா டுடே தளம் தெரிவிக்கின்றது.
இதுவரை 25 பேர் மீது எஃப்.ஐ.ஆர் போடப்பட்டுள்ளது. சமாஜ்வாதி கட்சி எம்பி ஜியா உர் ரஹ்மான் பார்க் மற்றும் உள்ளூர் எம்எல்ஏ இக்பால் மெஹ்மூத்தின் மகன் சோஹைல் இக்பால் ஆகியோரின் பெயர்களும் எஃப்.ஐ.ஆரில் சேர்க்கப்பட்டுள்ளது.
இந்த கலவரம் குறித்து விசாரிக்க 3 பேர் கொண்ட நீதி விசாரணை ஆணையம் அமைத்து உத்தரவிட்டுள்ளது உத்தரப்பிரதேசம் மாநில அரசு.
ஆய்வுக்குழுவின் அறிக்கை விசாரணை நீதிமன்றத்தில் சமர்பிக்கப்பட உள்ளது. அதை சீலிட்ட கவரில் வைக்க உச்ச நீதிமன்றம் அறிவுறுத்தியிருக்கிறது. இன்று, வெள்ளிக்கிழமை தொழுகை நடைபெறுவதனால் சம்பாலில் பாதுகாப்பு நவடிக்கைகள் அதிகரிக்கப்பட்டுள்ளன.
