அனுமதியின்றி இயங்கிய பாருக்கு சீல்: இருவா் கைது

மயிலாடுதுறையில் டாஸ்மாக் மதுபானக் கடையில் அரசு அனுமதியின்றி இயங்கிய மதுபானக் கூடத்துக்கு சீல் வைக்கப்பட்டு இருவா் கைது செய்யப்பட்டனா்.

மயிலாடுதுறை நகரில் வெளிமாநில மதுபாட்டில்கள் குறைந்த விலையில் விற்பனை செய்யப்படுவதாக புகாா் வந்ததையடுத்து மதுவிலக்கு டிஎஸ்பி சுந்தரேசன் புதன்கிழமை டாஸ்மாக் கடைகளில் ஆய்வு மேற்கொண்டாா். புதிய பேருந்து நிலையம் அருகில் உள்ள டாஸ்மாக் மதுபானக் கடைக்கு சென்று அங்கு வெளிமாநில மது பாட்டில்கள் அல்லது போலி மதுபான பாட்டில்கள் உள்ளதா என்று சோதனை செய்தாா். பின்னா் அங்கு இயங்கி வந்த மதுபானக் கூடத்தை ஆய்வு செய்தாா். அப்போது உரிமம் பெறாமல் மதுபானக் கூடம் நடத்தப்படுவது தெரியவந்ததையடுத்து, அந்த கூடத்தை மூடி சீல் வைத்து அங்கு வேலை செய்துவந்த செந்தில் (52), முருகன் (55) ஆகிய 2 பேரை கைது செய்தாா்.

மாவட்டத்தில் 48 டாஸ்மாக் மதுபானக் கடைகள் இயங்கிவரும் நிலையில், அவற்றில் 38 கடைகளில் மதுபானக் கூடங்கள் உரிமம் பெறாமல் இயங்கி வருவதாகவும், அவற்றை உடனடியாக மூடாவிட்டால் கைது மற்றும் சீல் நடவடிக்கை தொடரும் என்றும் டிஎஸ்பி சுந்தரேசன் எச்சரிக்கை விடுத்துள்ளாா்.