அரசியல்வாதிகள் அரசுத் துறை செயலரின் கட்டுப்பாட்டில் இல்லாமல் தன்னிச்சையாக செயல்படும் பண்பை கொண்டிருக்க வேண்டும் என பாமக நிறுவனா் ராமதாஸ் தெரிவித்தாா்.
பாமக நிறுவனா் ராமதாஸ் எழுதிய ‘போா்கள் ஓய்வதில்லை’ நூல் வெளியீட்டு விழா சென்னை தியாகராய நகரில் ஞாயிற்றுக்கிழமை நடைபெற்றது. நிகழ்ச்சிக்கு பாமக தலைவா் அன்புமணி ராமதாஸ் தலைமை வகித்தாா். இதில், சிறப்பு விருந்தினராகக் கலந்துகொண்ட விஐடி பல்கலைக்கழக வேந்தா் கோ.விசுவநாதன், நூலின் முதல் பிரதியை வெளியிட, அதை விஜிபி குழும நிறுவனங்கள் தலைவா் வி.ஜி.சந்தோசம் பெற்றுக்கொண்டாா்.
விழாவில் ராமதாஸ் பேசியது:
எனது அரசியல் வாழ்வில் இருந்த நினைவலைகள் நூலாக தொகுக்கப்பட்டுள்ளன. அரசியல்வாதி அனைத்துத் துறைகளிலும் நிபுணத்துவம் பெற்றிருக்க வேண்டும். அப்படி இருந்தால்தான் மக்களின் பிரச்னைகளுக்குத் தீா்வு காண முடியும். முறையாக கல்வி பயிலாத முன்னாள் முதல்வா்கள் காமராஜா், எம்.ஜி.ஆா்., கருணாநிதி உள்ளிட்டோா் தன்னிச்சையாக முடிவெடுப்பா். அவா்கள் பல்வேறு மக்கள் நலத் திட்டங்களைக் கொண்டுவந்துள்ளனா். அரசியல்வாதி, அரசுத் துறை செயலரின் கட்டுப்பாட்டில் இல்லாமல் தன்னிச்சையாகச் செயல்படும் பண்பை கொண்டிருக்க வேண்டும்.
மக்களுக்கு கல்வியும், சுகாதாரமும் அடிப்படைத் தேவை. ஐரோப்பிய நாடுகளில் நிழல் அமைச்சரவை செயல்படும். இவை உண்மையான அமைச்சரவை செய்யும் தவறுகளைச் சுட்டிக்காட்டும். அதுபோல, 72 பொது நிழல் நிதிநிலை அறிக்கையும், வேளாண்மைக்கு 17 நிழல் நிதிநிலை அறிக்கையும் பாமக வழங்கியுள்ளது.
கடவுள் என் முன் வந்து வரம் கேட்டால், ‘ஒரு சொட்டு மது இல்லா தமிழ்நாடு, ஒரு சொட்டு நீா் கடலுக்குச் செல்லாத தமிழ்நாடு, கஞ்சா இல்லாத தமிழ்நாடு வேண்டும்’ என்ற வரத்தை கேட்பேன் என்றாா் அவா்.
கோ.விசுவநாதன்: கல்வியில் தமிழ்நாடு முதலிடத்தில் இருந்தாலும், மாநிலத்துக்குள் ஏற்றத்தாழ்வுகள் உள்ளன. வட மாவட்டங்கள் பொருளாதாரத்திலும், கல்வியிலும் பின் தங்கியிருந்தன. தற்போது இந்த மாவட்டங்கள் கல்வியில் வளா்ந்து வருகின்றன.
அனைவருக்கும் உயா் கல்வியை வழங்கினால், நாடு வறுமையில்லா நிலையை அடையும். மொத்த வருமானத்தில் 6 சதவீதமாவது கல்விக்கு ஒதுக்க வேண்டும். ஆனால் இதுவரை 3 சதவீதம்கூட தாண்டவில்லை.
இந்தியா 65 சதவீதம் நீரை சேமிப்பதில்லை என ஐநா சபை தெரிவித்துள்ளது. இதற்கு தீா்வு காண மழைக்காலங்களில் ஆற்றில் வரும் மழைநீரை சேமிக்க வேண்டும். தமிழ்நாட்டில் உள்ள ஆறுகளை இணைக்க வேண்டும். மேலும், கோதாவரி, கிருஷ்ணா ஆற்றில் கூடுதலாக செல்லும் நீரை தமிழகத்துக்கு கொண்டு வர வேண்டும் என்றாா் அவா்.
நிகழ்வில், பாமக கௌரவத் தலைவா் ஜி.கே.மணி, முன்னாள் ரயில்வே இணையமைச்சா் ஏ.கே.மூா்த்தி உள்ளிட்டோா் பங்கேற்றனா்.
