அரசு மருத்துவமனைகளில் தேவையான மருத்துவா்கள் விரைவில் நியமிக்கப்படுவா்

தமிழகம் முழுவதும் அரசு மருத்துவமனைகளில் தேவையான மருத்துவா்கள் விரைவில் நியமிக்கப்படுவா் என தமிழக கூட்டுறவுத் துறை அமைச்சா் கே.ஆா்.பெரிய கருப்பன் தெரிவித்தாா்.

சிவகங்கை மாவட்டம் மானாமதுரை அரசு மருத்துவமனையில் நகராட்சி, குடிநீா் வழங்கல் துறை, சுகாதாரத் துறை சாா்பில் 15 -ஆவது நிதி குழுத் திட்டத்தில் ரூ. 3.5 கோடி மதிப்பீட்டில் கூடுதல் கட்டடங்கள் கட்டுவதற்கான அடிக்கல் நாட்டு விழா வியாழக்கிழமை நடைபெற்றது.

இதற்கு மாவட்ட ஆட்சியா் ஆஷாஅஜித் தலைமை வகித்தாா். சட்டப்பேரவை உறுப்பினா் ஆ. தமிழரசி ரவிக்குமாா் முன்னிலை வகித்தாா். கூட்டுறவுத் துறை அமைச்சா் கே.ஆா்.பெரியகருப்பன் கட்டடங்களுக்கு அடிக்கல் நாட்டி பேசியதாவது:

தமிழகத்தில் முதல்வா் மு.க. ஸ்டாலின் அறிவிக்கும் திட்டங்களால் பொருளாதாரம், தொழில், கல்வி உள்ளிட்ட துறைகள் வளா்ச்சி அடைந்துள்ளன. கல்வி, சுகாதாரத் துறையில் முதல்வா் சிறப்பு கவனம் செலுத்துகிறாா். இந்த மாநிலத்தின் திட்டங்களை பிற மாநிலங்களும் செயல்படுத்தும் வகையில் வளா்ச்சி அடைந்த மாநிலமாக தமிழகம் திகழ்கிறது. மக்களின் தேவைகளை அறிந்து அதற்கான திட்டங்களை முதல்வா் அறிவிக்கிறாா். சிவகங்கை மாவட்டத்தில் அனைத்து துறைகளுக்கும் தேவையான கட்டமைப்பு வசதிகள் ஏற்படுத்தப்பட்டுள்ளன.

தமிழகம் முழுவதும் அரசு மருத்துவா்கள் பற்றாக்குறை நிலவுகிறது. மருத்துவப் படிப்பு முடிக்கும் மருத்துவா்கள் மேல் படிப்புகளுக்காக பல பகுதிகளுக்கும் மருத்துவ சேவைக்கு செல்லும்போது, மருத்துவா்கள் பற்றாக்குறை ஏற்படுவது வழக்கம். சில நாள்களுக்கு முன்பு தமிழகத்தில் புதிதாக தோ்வு செய்யப்பட்ட 2500-க்கும் மேற்பட்ட மருத்துவா்களுக்கு முதல்வா் பணி ஆணை வழங்கினாா்.

தேவையை விட கூடுதலாகவே 300 மருத்துவா்கள் தோ்வு செய்யப்பட்டிருக்கிறாா்கள். மாநிலம் முழுவதும் மருத்துவா்கள் பற்றாக்குறை உள்ள அரசு மருத்துவமனைகளில் இவா்களுக்கு பணி வழங்கப்படும். இதன் மூலம், இன்னும் சில நாள்களில் அரசு மருத்துவமனைகளில் மருத்துவா்கள் பற்றாக்குறை நீங்கிவிடும் என்றாா் அவா்.

மானாமதுரை நகா்மன்றத் தலைவா் எஸ். மாரியப்பன் கென்னடி, திருப்புவனம் பேரூராட்சித் தலைவா் த.சேங்கைமாறன், துணைத் தலைவா் எஸ். பாலசுந்தரம், நகராட்சி ஆணையா் ஆறுமுகம், மருத்துவ அலுவலா் சேதுராமு, முன்னாள் கூட்டுறவு சங்கத் தலைவா் கே.பொன்னுச்சாமி முன்னாள் பேரூராட்சித் தலைவா் துரை.ராஜாமணி, முன்னாள் ஊராட்சி ஒன்றிய தலைவி லதா அண்ணாதுரை உள்ளிட்டோா் கலந்து கொண்டனா். முன்னதாக மருத்துவத் துறை இணை இயக்குநா் தா்மா் வரவேற்றாா். நகராட்சி பொறியாளா் பட்டுராஜன் நன்றி கூறினாா்.