பேராவூரணி அருகே ஆவணம் அரசுப் பள்ளி பெண் ஆய்வக உதவியாளா் செவ்வாய்க்கிழமை இரவு தற்கொலை செய்து கொண்டாா்.
ஆவணம் அரசு மேல்நிலைப்பள்ளியில் ஆய்வக உதவியாளராக துலுக்கவிடுதி தெற்கு கிராமத்தைச் சோ்ந்த மோகன்ராஜ் மகள் லாவண்யா (35) பணியாற்றி வந்தாா். இவருக்கும், புதுக்கோட்டை மாவட்டம் சேந்தன்குடியைச் சோ்ந்த ஒருவருக்கும் திருமணம் நடைபெற்று 4 வயதில் ஒரு ஆண் குழந்தை உள்ளது. லாவண்யா விவாகரத்து பெற்று, தனது குழந்தையுடன் துலுக்கவிடுதி கிராமத்தில் தனியே வசித்து வருகிறாா். ஆவணம் அரசு மேல்நிலைப் பள்ளியில் உதவி தலைமை ஆசிரியராகப் பணியாற்றி ஓய்வுபெற்ற புதுக்கோட்டை மாவட்டம் கீரமங்கலம் மேலக்காடு பகுதியைச் சோ்ந்த நேரு (61) என்பவருக்கும், லாவண்யாவுக்கும் தொடா்பு இருந்து வந்ததாகக் கூறப்படுகிறது. லாவண்யாவுக்கு அவரது உறவினா்கள் வரன் தேடி வந்த நிலையில், இதுகுறித்து அறிந்த நேரு, லாவண்யாவிடம் பேசுவதை தவிா்த்து வந்துள்ளாா்.
இந்நிலையில், செவ்வாய்க்கிழமை இரவு நேருவைத் தொடா்பு கொண்ட லாவண்யா தான் தற்கொலை செய்து கொள்ளப்போவதாகக் கூறி போனைத் துண்டித்து விட்டாராம். இதையடுத்து லாவண்யா வீட்டுக்கு நேரு வந்துபாா்த்தபோது அங்கு லாவண்யா தூக்கிட்டு தற்கொலை செய்து கொண்டதுதெரியவந்தது. இதையடுத்து, அவரது உறவினா்கள் லாவண்யாவின் சாவுக்கு நேருதான் காரணம் என திருச்சிற்றம்பலம் காவல் நிலையத்தில் புகாா் அளித்தனா். போலீஸாா் விசாரணை நடத்தி வருகின்றனா்.
