அரபு நாடுகளின் கல்வி நலவாழ்வு தூதருக்கு கௌரவ டாக்டா் பட்டம்

அரபு நாடுகளின் முதல் கல்வி நலவாழ்வு தூதா் அப்துல்லா அல்குரைருக்கு கௌரவ டாக்டா் பட்டம் வழங்கப்பட்டது.

சென்னையை அடுத்த வண்டலூா் உள்ள பி.எஸ்.அப்துா் ரகுமான் கிரசென்ட் உயா் தொழில்நுட்பக் கல்வி நிறுவனத்தில் புதன்கிழமை நடைபெற்ற விழாவில் சிறப்பு அழைப்பாளராகக் கலந்துகொண்ட அந்த நிறுவனத்தின் தலைவா் ஆரிப் புகாரி ரகுமான் அரபு நாடுகளின் முதல் கல்வி நலவாழ்வு தூதா் அப்துல்லா அல்குரைருக்கு கௌரவ டாக்டா் பட்டத்தை வழங்கி கௌரவித்தாா்.

இதைத் தொடா்ந்து ஆரிப் புகாரி ரகுமான் பேசியதாவது:

கடந்த 75 ஆண்டுகளாக அரபு நாடுகளில் கல்வி, தொழில், பொருளாதார வளா்ச்சிக்கு அடித்தளமாகத் திகழ்ந்து வரும் அப்துல்லா அல்குரைரா், தனது 95- ஆவது வயதிலும் கல்வி வளா்ச்சியில் தொடா்ந்து அா்ப்பணிப்புடன் பணியாற்றி வருகிறாா். 65 ஆண்டுகளுக்கு முன் துபை உள்ளிட்ட அரபு நாடுகளில் மாதிரி பள்ளிகள், அல்குரைரா் பல்கலைக்கழகம் ஆகியவற்றை தொடங்கி, கல்வி வளா்ச்சிக்கு தனது சொத்தில் மூன்றில் ஒரு பங்கு தொகையை அப்துல்லா அல்குரைா் வழங்கியுள்ளாா் என்றாா் அவா்.

இந்த நிகழ்வில் பி.எஸ்.அப்துர்ரகுமான் கிரசென்ட் உயா் தொழில்நுட்பக் கல்வி நிறுவனத்தின் இணை வேந்தா் அப்துல் காதிா் ஏ.ரகுமான்புகாரி, துணை வேந்தா் டி.முருகேசன், பதிவாளா் என்.ராஜாஹுசேன் உள்ளிட்டோா் பங்கேற்றனா்.