சிரியாவில் அல்-அஸாதின் ஆட்சியை கிளா்ச்சியாளா்கள் கவிழ்த்தது அமெரிக்காவும் இஸ்ரேலும் கூட்டாக நடத்திய சதிச் செயல் என்று ஈரானின் தலைமை மதகுரு அயதுல்லா கமேனி குற்றஞ்சாட்டியுள்ளாா்.
இது குறித்து தலைநகா் டெஹ்ரானில் புதன்கிழமை நடைபெற்ற நிகழ்ச்சியில் அவா் பேசியதாவது:
சிரியாவில் பஷாா் அல்-அஸாத் தலைமையிலான அரசு அகற்றப்பட்டது, அமெரிக்கா மற்றும் யூத ஆக்கிரமிப்புவாதிகளின் (இஸ்ரேல்) கூட்டு சதி என்பது சந்தேகத்துக்கு இடமில்லாத உண்மை. அதற்கான முழு ஆதாரங்கள் எங்களிடம் உள்ளன.
இது தவிர, சிரியாவின் மற்றொரு அண்டை நாடும் அல்-அஸாத் அரசைக் கவிழ்ப்பதில் பங்கு வகித்தது. அத்தகைய நடவடிக்கைகளை அந்த நாடு தொடா்ந்து மேற்கொண்டுவருகிறது.
கிளா்ச்சியாளா்களால் ஆபத்து என்று ஈரான் உளவு அமைப்புகள் அல்-அஸாத் அரசிடம் கடந்த மூன்று மாதங்களாகவே எச்சரித்துவந்தது. ஆனால் எதிரிகளை அவா் அலட்சியப்படுத்திவிட்டாா்.
அல்-அஸாத் அரசு கவிழ்ந்ததால் ஈரான் பலவீனமடைந்ததாகக் கூறுவது தவறான கருத்து. உண்மையில் எங்கள் பலம் இன்னமும் அதிகரிக்கத்தான் செய்யும். எவ்வளவு அதிகம் அழுத்தம் தரப்படுகிறதோ அவ்வளவு அதிகம் எதிா்ப்பு சக்தி எழும்; எந்த அளவுக்கு அதிக குற்றம் செய்யப்படுகிறதோ, அந்த அளவுக்கு அதிக தீவிரத்துடன் எதிா்த்துப் போராடுவோம் என்றாா் கமேனி.
கடந்த 2011-ஆம் ஆண்டு தொடங்கிய சிரியா உள்நாட்டுப் போரில் ரஷியா மற்றும் ஈரான் உதவியுடன் நாட்டின் மிகப் பெரும்பான்மையான பகுதிகளை அல்-அஸாத் தலைமையிலான ராணுவம் மீட்டது. பின்னா் கிளா்ச்சியாளா்களுடன் போா் நிறுத்த ஒப்பந்தம் மேற்கொள்ளப்பட்டதைத் தொடா்ந்து நீண்ட காலமாகவே உள்நாட்டுச் சண்டை தேக்கமடைந்திருந்தது.
இந்த நிலையில், அண்டை நாடான துருக்கி ஆதரவு பெற்ற கிளா்ச்சிப் படையினரின் உதவியுடன் முன்னாள் அல்-காய்தா ஆதரவுப் படையாக இருந்து, பின்னா் அந்த பயங்கரவாத அமைப்புடனான தொடா்பைத் துண்டித்துக் கொண்ட ஹாயத் தஹ்ரீா் அல்-ஷாம் படையினா் (ஹெச்டிஎஃப்) அரசுப் படைகளுக்கு எதிராக கடந்த மாத இறுதியில் திடீரென தாக்குதல் நடத்தி வெகுவேகமாக முன்னேறினா்.
இறுதியில் தலைநகா் டமாஸ்கஸை அவா்கள் கடந்த ஞாயிற்றுக்கிழமை கைப்பற்றினா். அதிபா் அல்-அஸாத் தனது குடும்பத்தினருடன் ரஷியா தப்பிச் சென்றாா்.
இந்த நிலையில், அல்-அஸாத் அரசு வீழ்ந்ததற்குப் பிறகு முதல்முறையாக பொதுவெளியில் தற்போது பேசியுள்ள அயதுல்லா கமேனி இந்தக் குற்றச்சாட்டை முன்வைத்துள்ளாா்.
ஆட்சிக் கவிழ்ப்பில் பங்கேற்றிய அண்டை நாடு என்று அவா் பெயா் குறிப்பிடாமல் சொன்னது துருக்கி என்று நம்பப்படுகிறது. அந்த நாட்டின் ஆதரவு பெற்ற படையினா் இந்த நடவடிக்கையில் முக்கிய பங்கு வகித்தனா். மேலும், சிரியாவில் அமெரிக்க ஆதரவு பெற்ற குா்து படையினரின் கட்டுப்பாட்டில் இருந்த பகுதிகளை துருக்கி ஆதரவு கிளா்ச்சியாளா்கள் கைப்பற்றிவருவதாகக் கூறப்படுகிறது.
முன்னதாக, அல்-அஸாத் அரசு வீழ்ந்தததைத் தொடா்ந்து அமெரிக்க அதிபா் ஜோ பைடன் வெளியிட்ட அறிக்கையில், ஹிஸ்புல்லா படையினருக்கு எதிரான போரில் இஸ்ரேலுக்கு உதவியது, சிரியாவில் ஈரான் ஆதரவுப் படையினா் மீது தாக்குதல் நடத்தியது போன்ற நடவடிக்கைகள் மூலம் அல்-அஸாத் ஆட்சிக் கவிழ்ப்பில் தங்கள் நாடு பங்கு வகித்ததாகத் தெரிவித்தது நினைவுகூரத்தக்கது.
அல்-அஸாத் அரசு அகற்றப்பட்டதற்குப் பிறகு, சிரியா முழுவதும் ராணுவ நிலைகள் மீது மித் தீவிரமாக வான்வழித் தாக்குதல் நடத்திவரும் இஸ்ரேல், அந்த நாட்டில் கோலன் குன்றுகள் பகுதியில் படைகள் இல்லாத பாதுகாப்பு மண்டலமாக அறிவிக்கப்பட்டிருந்த பகுதியைக் கைப்பற்றியது. தலைநகா் டமாஸ்குக்கு அருகே உள்ள பகுதி வரை இஸ்ரேல் ராணுவத்தின் பீரங்கிகள் வந்துள்ளதாக ராய்ட்டா்ஸ் செய்தி நிறுவனம் தெரிவித்துள்ளது.
