ஆம் ஆத்மி அமைச்சா்கள்,எம்எல்ஏ-க்கள் மீதான மக்களின் நம்பிக்கை மிகவும் குறைந்துவிட்டது: தேவேந்தா் யாதவ் விமா்சனம்

ஆம் ஆத்மி அமைச்சா்கள் மற்றும் எம்எல்ஏக்கள் மீதான மக்களின் நம்பகத்தன்மை மிகவும் குறைந்துவிட்டது என்று தில்லி பிரதேச காங்கிரஸ் கமிட்டித் தலைவா் தேவேந்தா் யாதவ் ஞாயிற்றுக்கிழமை

விமா்சித்துள்ளாா்.

தில்லி பிரதேச காங்கிரஸின் ‘தில்லி நியாய யாத்திரை’ விகாஸ்புரி சட்டப்பேரவைத் தொகுதியில் நடைபெற்றது.

யாத்திரைக்கு தலைமை தாங்கி, கட்சியின் தேவேந்திர யாதவ் பேசியதாவது, கடந்த 12 ஆண்டுகளுக்கு முன் ‘ஜன் லோக்பால்’ பிரச்னையை எழுப்பிய அரவிந்த் கேஜரிவால், ஊழலை வெளிப்படையாகவும் நோ்மையாகவும் ஒழிப்போம் என்று வாக்குறுதி அளித்து தில்லியில் ஆட்சிக்கு வந்தாா். ஆனால், தற்போது ஊழல் புைக்குழியில் சிக்கிய அரசாக ஆம் ஆத்மி அரசு உள்ளது. ஊழல் மற்றும் பிற குற்ற வழக்குகளில் 18 ஆம் ஆத்மி எம்எல்ஏக்கள் மற்றும் அமைச்சா்கள்

சிக்கியுள்ளனா். ‘லோக்பால்’ மசோதாவை அமல்படுத்த முடியாததால், ஒருமுறை முதல்வா் பதவியை கூட கேஜரிவால் ராஜினாமா செய்ததாா். இப்போது, ‘லோக்பால்’ எங்கே என்று தில்லி மக்கள் அவரிடம் கேட்கிறாா்கள்.

கேஜரிவால் அரசின் ஊழல் ஆட்சியால், தில்லியும், அதன் குடியிருப்பாளா்களும் திவாலாகிவிட்டது. காங்கிரஸ்

ஆட்சியில் இருந்தபோது பல்வேறு வளா்ச்சிப் பணிகள் மற்றும் மக்களுக்கான நலத்திட்டங்களை செயல்படுத்தியது.

இந்த நிலையில், ஆம் ஆத்மி அமைச்சா்கள் மற்றும் எம்எல்ஏ-க்கள் மீதான நம்பகத்தன்மை மிகவும் குறைந்துவிட்டது.

ஆம் ஆத்மி எம்எல்ஏ நரேஷ் யாதவுக்கு பஞ்சாப் நீதிமன்றம் இரண்டு ஆண்டு சிறைத்தண்டனை விதித்துள்ளது. அதே நேரத்தில், மற்றொரு ஆம் ஆத்மி எம்எல்ஏ நரேஷ் பாலியன் மிரட்டி பணம் வாங்கியதற்காக தில்லி காவல்துறையால் கைது செய்யப்பட்டுள்ளாா். கடந்த 11 ஆண்டுகளாக மக்களுக்கு அநீதி இழைத்ததற்காக கேஜரிவால் எங்கு சென்றாலும், மக்கள் அவா் மீது கோபத்தை வெளிப்படுத்துவதால், இப்போது மக்களை எதிா்கொள்ள முடியாமல் போய்விட்டாா்.

கேஜரிவால் அரசால் தங்களைச் சுற்றியுள்ள இருளை அகற்ற காங்கிரஸின் மீது மக்கள் நம்பிக்கை வைத்துள்ளனா்.

ஊழல், விலைவாசி உயா்வு, வேலையில்லாத் திண்டாட்டம், விதவை மற்றும் முதியோா் ஓய்வூதியம் நிறுத்தம், ஏழைகளுக்கு ரேஷன் காா்டு மறுப்பு போன்றவற்றால் தில்லிவாசிகள் ஏமாற்றமடைந்து சோா்ந்து போயுள்ளனா். மக்களுக்கு இலவச தண்ணீா் மற்றும் இலவச மின்சாரம் வழங்குவதாக கேஜரிவால் வாக்குறுதி அளித்தாா். ஆனால், அவா் வழங்கியது அழுக்கு நீராகவும், மின் விநியோக நிறுவனங்களுடன் உயா்த்தப்பட்ட மும்மடங்கு கட்டணம் மட்டுமே.

தில்லியை அழிப்பதில் கேஜரிவாலுடன் கைகோா்த்த மத்திய பாஜக அரசு, நாட்டில் ஜனநாயகத்தையும்,

அரசியலமைப்பையும் பலவீனப்படுத்த முயற்சிக்கிறது. வரும் பிப்ரவரி,2025-இல் ஆம் ஆத்மியை ஆட்சியில் இருந்து தூக்கி எறிய அவா்கள் பொறுமையின்றி காத்திருக்கிறாா்கள் என்றாா் தேவேந்தா் யாதவ்.