``ஆயுர்வேத மருந்து உற்பத்தி 8 மடங்கு அதிகரிப்பு; 150 நாடுகளுக்கு ஏற்றுமதி'' - ஆயுஷ் நிகழ்வில் தகவல்!
Admin
- 2 hours ago
நாட்டிலேயே முதல் மாநிலமாக யோகாவுக்கென்று தனி கொள்கைகள் வகுத்து செயல்படுத்தும் மாநிலமாக உத்தரகாண்ட் உருவாகும் என அந்த மாநில முதலமைச்சர் சிங் தாமி தெரிவித்துள்ளார்.
சுகாதாரத்துறையில் ஆயுர்வேத மருத்துவத்துடன் யோகாவையும் அங்கமாக்கும் வகையில் இந்த யோகா கொள்கைகள் செயல்படும் எனத் தெரிவித்துள்ளார். இது ஆயுர்வேத மருத்துவ உலகில் புதிய புரட்சியை உருவாக்கும் எனக் கருதுகிறார்.
10 -வது உலக ஆயுர்வேதா காங்கிரஸ் மற்றும் ஆரோக்யா எக்ஸ்போ - 2024 நிகழ்வில் இந்த தகவலை பகிர்ந்துள்ளார் முதல்வர். இந்த எக்ஸ்போவில் 50 நாடுகளைச் சேர்ந்த 3000-க்கும் மேற்பட்ட வல்லுநர்கள் கலந்துகொண்டனர். மத்திய ஆயுஷ் அமைச்சகம் உத்தரகாண்டில், அகில இந்திய ஆயுர்வேத நிறுவனம் அமைக்க வேண்டுமென கோரிக்கை வைத்தது.
மேலும் ஆரோக்கியம், கல்வி, ஆராய்ச்சி, மூலிகை மருந்துகள் தயாரிப்பை ஊக்குவிக்கும் வகையில் மாவட்டந்தோறும் ஆயுஷ் கிராமம் ஒன்றை அமைக்கவும், ஆயுஷ் தொலைத்தொடர்பு நிலையங்கள், 50 யோகா ஆரோக்கிய மையங்கள் அமைக்கவும் திட்டமிருப்பதாக தெரிவித்துள்ள தாமி, மூலிகைகளின் இந்தி பெயருடன் ஆங்கிலப் பெயர்களையும் பயன்படுத்த வேண்டும். இது உலகளாவிய சந்தையில் அவற்றைக் கொண்டுசெல்லும் எனக் கூறியுள்ளார்
மத்திய இணையமைச்சர் ப்ரதாப்ராவ், கடந்த 10 ஆண்டுகளில் ஆயுர்வேத மருந்துப்பொருள்கள் உற்பத்தி, 8 மடங்கு அதிகரித்திருப்பதாக தெரிவித்துள்ளார். மேலும் ஆயுர்வேத மருந்துகள் மற்றும் மூலிகைகளை இந்தியா 150 நாடுகளுக்கு ஏற்றுமதி செய்வதையும் குறிப்பிட்டுள்ளார்.
இந்திய பிரதமர் நரேந்திர மோடி இந்த நிகழ்வில் கலந்துகொள்ளவில்லை என்றாலும் அவரது செய்தியை வாசித்தார் தலைமைச் செயலாளர் ராதா ரதூரி.
பிரதமர், "ஆயுர்வேதம் பல்வேறு உடல்நல சிக்கல்களுக்கு விரிவான தீர்வை வழங்குகிறது. நோய் தடுப்பு, ஊட்டச்சத்து, மனநலம் ஆகியவற்றுக்கு சமமான முக்கியத்துவம் வழங்குவதால் ஆயுர்வேதத்துக்கு உலகளாவிய சுகாதார அமைப்புகளை வலுப்படுத்தும் திறன் இருக்கிறது." எனத் தெரிவித்துள்ளார்.
