ஆஸ்திரேலியாவில் கொண்டாடப்படும் தமிழ் பாரம்பரிய மாதம்!

ஆஸ்திரேலியாவில் ஜனவரி மாதத்தைத் தமிழ் பாரம்பரிய மாதமாக அங்கீகரிக்க வேண்டுமென ஆஸ்திரேலிய எம்பி ஆண்ட்ரூ சார்ல்டன் கோரிக்கை வைத்துள்ளார்.

ஆஸ்திரேலியாவில் தமிழ் கலாசாரம் மற்றும் பாரம்பரியத்தை ஊக்குவிக்கும் விதமாக ஜனவரி மாதத்தை தமிழ் பாரம்பரிய மாதமாக அறிவிக்குமாறு ஆஸ்திரேலிய எம்பி ஆண்ட்ரூ சார்ல்டன் நாடாளுமன்றத்தில் முன்மொழிந்துள்ளார்.

ஜனவரி மாதத்தில் குறிப்பாக தமிழர்கள் தைப்பொங்கல் கொண்டாடுவதைக் குறிப்பிட்ட அவர், ”சூரியன், நிலம், மழை, விவசாயம் போன்றவைக்கு மரியாதை செலுத்தும் விதமாக ஜனவரி மாதத்தில் 4 நாள்கள் அறுவடை நாள்களாக தமிழர்களால் கொண்டாடப்படுகிறது.

5,000 ஆண்டுகள் பழமையான ஒரு பாரம்பரியத்தைக் கொண்டாடுவதன் மூலம், நெறிமுறைகள், நிர்வாகம், மனித விழுமியங்களின் மதிப்பு குறித்து மக்களை சிந்திக்கத் தூண்டும் திருக்குறள் போன்ற பண்டைய தமிழ் இலக்கியங்களையும் இது அங்கீகரிக்க உதவும்.

மேலும், தமிழ் பாரம்பரிய மாதம் கொண்டாடப்படுவது உள்ளூர் வர்த்தகர்களுக்கும் பயனளிக்கும்” என்று அவர் ஆஸ்திரேலிய நாடாளுமன்றத்தில் குறிப்பிட்டார்.

இதையும் படிக்க | வங்கதேசத்தில் 3 ஹிந்து கோயில்கள் மீது தாக்குதல்

ஆண்ட்ரூ சார்ல்டன் முன்மொழிந்ததை வரவேற்ற பூர்வீக இலங்கைத் தமிழரான எம்பி மிச்செல் ஆனந்த ராஜா, “இதன் மூலம், ஆஸ்திரேலியாவில் வசிக்கும் தமிழ்ச் சமூகத்தினர் தங்களின் பாரம்பரியத்தைக் கொண்டாட உதவும்” என்று கூறினார்.

இதன்படி, தமிழ் பாரம்பரிய மாதக் கொண்டாட்டம் ஜனவரி 25 ஆம் தேதி கொண்டாடப்படும் எனக் கூறப்படுகிறது.