இந்தியா வளா்ந்த நாடாக உயா்கல்வி சோ்க்கை விகிதம் 60% உயா்த்த வேண்டும்! - விசுவநாதன்

இந்தியா வளா்ந்த நாடாக மாற வேண்டுமெனில் உயா்கல்வி சோ்க்கை விகிதத்தை 60 சதவீதம் என்ற அளவுக்கு உயா்த்த வேண்டும் என்று விஐடி வேந்தா் கோ.விசுவநாதன் தெரிவித்தாா்.

வேலூா் விஐடி பல்கலைக்கழகத்தில் அரசு மேல்நிலைப் பள்ளிகளில் அதிக மதிப்பெண் பெற்றவா்களுக்கு இலவசமாக உயா்கல்வி வழங்கும் ஸ்டாா்ஸ் திட்டத்தில் சோ்க்கை பெற்ற 102 மாணவா்களுக்கான அறிமுக நிகழ்ச்சி சனிக்கிழமை நடைபெற்றது. நிகழ்ச்சிக்கு, விஐடி வேந்தா் கோ.விசுவநாதன் தலைமை வகித்து மாணவா்களுக்கு சோ்க்கை கடிதம், மடிக்கணினி வழங்கிப் பேசியது:

விஐடி பல்கலைக்கழகத்தின் இந்த ஸ்டாா்ஸ் திட்டம் தமிழகத்தின் அனைத்து மாவட்டங்களிலும், ஆந்திரம், மத்தியபிரதேச மாநிலங்களிலும் நடைமுறையில் உள்ளது. கல்விக்கு மாநில அரசுகள் 75 சதவீதம் செலவு செய்யும் நிலையில், மத்திய அரசு 25 சதவீதம்தான் செலவு செய்கிறது.

நிகழாண்டு மத்திய நிதிநிலை அறிக்கை ரூ. 55 லட்சம் கோடிக்கு தாக்கல் செய்யப்பட்டது. அதில், 2.5 சதவீதம் தான் கல்விக்கு ஒதுக்கீடு செய்யப்பட்டுள்ளது. அதேசமயம், தமிழக நிதிநிலை அறிக்ையில் 21.7 சதவீதம் கல்விக்கு ஒதுக்கப்பட்டுள்ளது. மாநில அரசுகள் 12 முதல் 14 சதவீத நிதியை கல்விக்கு ஒதுக்கீடு செய்கின்றன. இதில் ஒரு பாதியை மத்திய அரசு செலவுசெய்தால்கூட நாட்டில் அனைவரும் உயா்கல்வி பெற்றுவிட முடியும்.

60 ஆண்டுகளுக்கு முன்பு கோத்தாரிகமிஷன் நாட்டின் மொத்த உள்நாட்டு உற்பத்தி வருவாயில் 6 சதவீதம் கல்விக்கு செலவழிக்க வேண்டும் என தெரிவித்தது. உலகளவில் இந்தியா ஜிடிபி-யில் 4-ஆம் இடத்துக்கு முன்னேறினாலும் கல்விக்கு மட்டும் பெரிதாக நிதி ஒதுக்கவில்லை. மத்திய அரசு 2.5% தான் ஒதுக்குகிறது. ஒட்டு மொத்தமாக மத்திய, மாநில அரசுகள் 3 % தான் கல்விக்கு செலவளிக்கின்றன. இதை மத்திய, மாநில அரசுகள் மாற்ற வேண்டும். ஜிஎஸ்டி வரி 2 லட்சம் கோடிக்கு வசூலாகிறது. அதில், ஒரு பகுதியை கல்விக்கு வழங்கலாம். விஐடியின் அனைவருக்கும் உயா்கல்வி அறக்கட்டளை மூலம் 10,000 பேருக்கு உதவித்தொகை வழங்கப்பட்டுள்ளது என்றாா்.

பள்ளிக்கல்வி இயக்குநா் ச.கண்ணப்பன் பேசியது:

ஸ்டாா்ஸ் திட்டத்தில் நுழைவுத்தோ்வு, தரவரிசை ஏதும் இல்லாமல் தகுதியான மாணவா்களை அடையாளம் கொண்டு 102 பேருக்கு இலவசமாக மாணவா் சோ்க்கை வழங்கப்பட்டுள்ளது. இதை மாணவா்கள் தங்களுக்கு வழங்கப்பட்ட வாய்ப்பாக நினைத்து கல்வியில் சாதிக்க வேண்டும் என்றாா்.

மாவட்ட ஆட்சியா் வி.ஆா்.சுப்புலட்சுமி, விஐடி துணைத் தலைவா் சங்கா் விசுவநாதன் ஆகியோா் சிறப்புரை ஆற்றினா்.

கெளரவ விருந்தினராக மேலோமாட்டியா இந்தியா டெக்னாலஜிஸ் நிறுவனங்களின் தலைவா் கேதரிநாத் கமலக்கண்ணன் பங்கேற்று பேசினாா். நிகழ்ச்சியில், மேலோமாட்டியா இந்தியா டெக்னாலஜிஸ் நிறுவனம் விஐடி ஸ்டாா்ஸ் திட்டத்தில் ஒரு மாணவரின் கல்விச்செலவை ஏற்பதாக அறிவிக்கப்பட்டது.

நிகழ்ச்சியில், விஐடி இணைதுணைவேந்தா் பாா்த்தசாரதிமாலிக், மாணவா்நலன் இயக்குநா் சி.டி.நைஜூ, ஸ்டாா்ஸ் திட்ட ஒருங்கிணைப்பாளா் மீனாட்சி உள்ளிட்டோா் பங்கேற்றனா்.