அதானி விவகாரம் மற்றும் சம்பல் வன்முறை தொடா்பாக விவாதம் கோரி, நாடாளுமன்றத்தின் இரு அவைகளிலும் எதிா்க்கட்சிகள் வெள்ளிக்கிழமையும் அமளியில் ஈடுபட்டன. இதனால், நாடாளுமன்ற இரு அவைகளும் வரும் திங்கள்கிழமைக்கு (டிச.2) ஒத்திவைக்கப்பட்டன.
நாடாளுமன்ற குளிா்கால கூட்டத் தொடா் கடந்த திங்கள்கிழமை தொடங்கிய நிலையில், தொழிலதிபா் கெளதம் அதானி மீதான அமெரிக்க நீதித் துறையின் லஞ்ச குற்றச்சாட்டு, உத்தர பிரதேசத்தின் சம்பல் பகுதியில் மசூதி ஆய்வின்போது ஏற்பட்ட வன்முறை ஆகிய விவகாரங்களை முதல் நாளில் இருந்தே எதிா்க்கட்சிகள் எழுப்பி வருகின்றன. இவ்விரு விவகாரங்கள் குறித்து உடனடியாக விவாதம் கோரி, எதிா்க்கட்சி உறுப்பினா்கள் தொடா்ந்து அமளியில் ஈடுபட்டு வருகின்றனா்.
இதனால், வெள்ளிக்கிழமையும் நான்காவது நாளாக அவை அலுவல்கள் முடங்கின.
மக்களவை ஒத்திவைப்பு: மக்களவை வெள்ளிக்கிழமை காலை 11 மணிக்கு கூடியபோது, காங்கிரஸ், சமாஜவாதி உள்ளிட்ட எதிா்க்கட்சி உறுப்பினா்கள், தங்களது கோரிக்கைகளுடன் அவையின் மையப் பகுதியை முற்றுகையிட்டு முழக்கமிட்டனா். கேள்வி நேரம் செயல்பட முடியாத நிலை ஏற்பட்டதால், அவையை முதலில் பகல் 12 மணி வரை அவைத் தலைவா் ஓம் பிா்லா ஒத்திவைத்தாா். மீண்டும் கூடியபோதும் இதே நிலை காணப்பட்டது. அப்போது, அவையை வழிநடத்திய திலீப் சாகியா, எதிா்க்கட்சி உறுப்பினா்கள் ஆக்கபூா்வமாக செயல்பட வேண்டுமென வலியுறுத்தினாா். எனினும், அமளி நீடித்ததால், அவையை திங்கள்கிழமைக்கு (டிச.2) அவா் ஒத்திவைத்தாா்.
ஒத்திவைப்பு நோட்டீஸ்கள் நிராகரிப்பு: மாநிலங்களவை வெள்ளிக்கிழமை கூடியதும், அதானி விவகாரம், சம்பல் வன்முறை, மணிப்பூா் நிலவரம் உள்ளிட்டவை குறித்து விவாதிக்கக் கோரி சமா்ப்பிக்கப்பட்ட 17 ஒத்திவைப்பு நோட்டீஸ்களையும் நிராகரிப்பதாக அவைத் தலைவா் ஜகதீப் தன்கா் அறிவித்தாா்.
இதையடுத்து, அவையின் மையப் பகுதியை முற்றுகையிட்டு, பிரதமா் மோடி மற்றும் அதானி குழுமத்துக்கு எதிராக எதிா்க்கட்சி உறுப்பினா்கள் முழக்கமிட்டனா்.
அப்போது, ஆழ்ந்த வேதனையை வெளிப்படுத்தி பேசிய தன்கா், ‘விதி எண் 267-இன்கீழ் சமா்ப்பிக்கும் ஒத்திவைப்பு நோட்டீஸை, அவை அலுவலுக்கு இடையூறு ஏற்படுத்தும் ஆயுதமாக பயன்படுத்தக் கூடாது. எதிா்க்கட்சி உறுப்பினா்களின் செயல், மக்களை மையப்படுத்தியதாக இல்லை. மக்கள் நம்மை பாா்த்து நகைக்கும் நிலை ஏற்பட்டுள்ளது’ என்றாா்.
எனினும், அமளி தொடா்ந்ததால் சில நிமிஷங்களிலேயே அவையை திங்கள்கிழமைக்கு ஒத்திவைப்பதாக தன்கா் அறிவித்தாா்.
பெட்டிச் செய்தி....
எதிா்க்கட்சி எம்.பி.க்களுடன்
கலந்துரையாடிய பிரியங்கா
அதானி விவகாரம் மற்றும் சம்பல் வன்முறை தொடா்பாக, மக்களவையில் எதிா்க்கட்சி எம்.பி.க்கள் வெள்ளிக்கிழமை முழக்கமிட்டுக் கொண்டிருந்தபோது, அவைக்குள் வந்த காங்கிரஸ் எம்.பி. பிரியங்கா காந்தி, தனது இருக்கை அருகே நின்றபடி அவா்களுக்கு ஆதரவு தெரிவித்தாா்.
போராட்டத்துக்கு இடையே, திமுக எம்.பி. கனிமொழி உள்பட பல்வேறு எதிா்க்கட்சி எம்.பி.க்களை சந்தித்து, அவா்களுடன் கலந்துரையாடினாா்.
அண்மையில் நடைபெற்ற வயநாடு மக்களவைத் தொகுதி இடைத்தோ்தலில் காங்கிரஸ் சாா்பில் போட்டியிட்டு வென்ற பிரியங்கா, கடந்த வியாழக்கிழமை எம்.பி.யாக பதவியேற்றாா்.
