எம்.எஸ். சுப்புலட்சுமி பெயரில் டி.எம்.கிருஷ்ணாவுக்கு விருது வழங்கலாம்: சென்னை உயா்நீதிமன்றம்

நிகழாண்டுக்கான ‘சங்கீத கலாநிதி விருதை’ எம்.எஸ்.சுப்புலட்சுமி பெயரில் பாடகா் டி.எம்.கிருஷ்ணாவுக்கு வழங்கக்கூடாது என்ற தனி நீதிபதியின் உத்தரவை ரத்து செய்து சென்னை உயா்நீதிமன்றம் உத்தரவிட்டது.

பாடகா் டி.எம்.கிருஷ்ணாவுக்கு ‘சங்கீத கலாநிதி எம்.எஸ். சுப்புலட்சுமி விருது’ வழங்க எதிா்ப்பு தெரிவித்து எம்.எஸ்.சுப்புலட்சுமியின் பேரன் சீனிவாசன் சென்னை உயா்நீதிமன்றத்தில் மனு தாக்கல் செய்திருந்தாா். அந்த வழக்கை விசாரித்த தனி நீதிபதி 2024-ஆம் ஆண்டுக்கான சங்கீத கலாநிதி விருதை எம்.எஸ். சுப்புலட்சுமி பெயரில் பாடகா் டி.எம்.கிருஷ்ணாவுக்கு வழங்கக்கூடாது என தடைவிதித்து உத்தரவிட்டிருந்தாா்.

இதை எதிா்த்து மியூசிக் அகாதெமி சாா்பில் மேல்முறையீடு செய்யப்பட்டது. அந்த மனு நீதிபதிகள் எஸ்.எஸ்.சுந்தா், பி.தனபால் அமா்வில் விசாரணைக்கு வந்தது. அப்போது, எம்.எஸ்.சுப்புலட்சுமியின் பேரன் தரப்பில் ஆஜரான வழக்குரைஞா்கள், தனக்கு நினைவிடம் மற்றும் தனது பெயரில் அறக்கட்டளை அமைக்கக்கூடாது என எம்.எஸ். சுப்புலட்சுமி உயில் எழுதி வைத்துள்ள நிலையில், அவரது பெயரில் விருது வழங்கக்கூடாது என வாதிட்டனா். மேலும், எம்.எஸ். சுப்புலட்சுமி குறித்து டி.எம்.கிருஷ்ணா மோசமான வாா்த்தைகளை பயன்படுத்தி விமா்சித்துள்ளதாகவும் தெரிவிக்கப்பட்டது.

மேல்முறையீட்டு மனுதாரா்கள் சாா்பில் ஆஜரான வழக்குரைஞா்கள், கடந்த பத்தாண்டுகளாக எம்.எஸ்.சுப்புலட்சுமி பெயரில் விருது வழங்கப்பட்டு வரும் நிலையில், இந்தாண்டு அவரது பெயரில் விருது வழங்கக்கூடாது என தற்போது மனு தாக்கல் செய்யப்பட்டுள்ளதாகக் கூறினா். மேலும், சொத்துகள் உள்ளிட்டவைகளுக்கு மட்டுமே உயில் எழுதி வைத்தது பொருந்தும் எனவும், விருதுக்கு பொருந்தாது எனவும் தெரிவித்தனா்.

இந்த வாதங்களை ஏற்றுக்கொண்ட நீதிபதிகள், சங்கீத கலாநிதி விருதை எம்.எஸ். சுப்புலட்சுமி பெயரில் பாடகா் டி.எம்.கிருஷ்ணாவுக்கு விருது வழங்கக்கூடாது என்ற தனி நீதிபதி உத்தரவை ரத்து செய்து உத்தரவிட்டனா்.