ஒசூரில் 5,000 வீடுகளுக்கு வீட்டுமனை பட்டா வழங்கப்படும்: மாநகர மேயா் எஸ்.ஏ.சத்யா

ஆட்சேபணை அற்ற அரசு நிலங்களில் 5 ஆண்டுகளுக்கு மேல் வசிக்கும் 5,000 பேருக்கு வீட்டுமனை பட்டா விரைவில் வழங்கப்படும் என்று ஒசூா் மாநகராட்சி மேயா் எஸ்.ஏ.சத்யா தெரிவித்தாா்.

ஒசூா் மாநகராட்சி மாமன்றக் கூட்டம் மேயா் எஸ்.ஏ.சத்யா தலைமையில் வியாழக்கிழமை நடைபெற்றது. ஆணையா் பூங்கொடி, துணை மேயா் சி.ஆனந்தய்யா ஆகியோா் முன்னிலை வகித்தனா். கூட்டத்தில் நிகழ் நிதிநிலை அறிக்கைக்கான வரவு செலவு திட்ட அறிக்கையை மேயா் எஸ்.ஏ.சத்யா மாமன்றத்தில் சமா்ப்பித்தாா். அதையடுத்து நடைபெற்ற விவாதம்:

மேயா் எஸ்.ஏ.சத்யா மன்றக் கூட்டத்தில் வரவு செலவு திட்ட அறிக்கையை சமா்ப்பித்துப் பேசியதாவது:

ஒசூரில் மாநகரில் கடந்த ஆண்டு ரூ.15.6 கோடி மதிப்பில் சாலைப் பணிகள் நடைபெற்றன. ரூ. 5.38 கோடிக்கு வடிகால் பணிகள், ரூ. 2.76 கோடிக்கு கட்டடப் பணிகள், ரூ. 8.43 கோடியில் குடிநீா் பணிகள், புதை சாக்கடை திட்டம் ரூ. 582.54 கோடியில் நடைபெற்று வருகின்றன என்பன உள்பட வரவு செலவு திட்ட அறிக்கை குறித்து பேசினாா்.

மன்ற உறுப்பினா் முருகம்மா (அதிமுக): மாநகராட்சிக்கு உள்பட்ட தின்னூரில் ஏழைகள் அதிகம் வசிக்கின்றனா். அவா்களுக்கு வீட்டுமனை பட்டா வழங்கப்படுமா?

மேயா் எஸ்.ஏ.சத்யா: ஒசூா் மாநகராட்சியில் பல ஆண்டுகளாக வீட்டுமனை பட்டா வழங்க தடை விதிக்கப்பட்டுள்ளது. தற்போது அந்த விதியை தமிழக முதல்வா் மு.க.ஸ்டாலின் தளா்த்தியுள்ளாா். இதனால், 5 ஆண்டுகளுக்கு மேல் ஆட்சேபணை அற்ற அரசு நிலங்களில் வசிக்கும் 5 ஆயிரம் பேருக்கு வீட்டு மனை பட்டா வழங்க நடவடிக்கை எடுக்கப்படும்.

மாதேஸ்வரன் (திமுக): மாநகராட்சியில் குப்பை வரியை குறைக்க நடவடிக்கை எடுக்க வேண்டும். கடந்த 40 நாள்களாக ஒசூா் மாநகராட்சிக்கு நிரந்தர ஆணையரை நியமிக்க வேண்டும். புதிதாக கட்டப்பட்டு வரும் பேருந்து நிலையத்திற்கு எதிரில் தேசிய நெடுஞ்சாலையில் பட்டாம்பூச்சி வடிவிலான மேம்பாலம் கட்ட வேண்டும். பாகலூா் சாலையை சீரமைக்க வேண்டும்.

சங்கா்(எ) குபேந்திரன் (அதிமுக):

எம்.ஜி.ஆா். மாா்க்கெட்டில் அனைத்துக் கடைகளையும் ஏலம் விடவேண்டும். ஒசூரில் உள்ள பூங்காக்களை மேம்படுத்தி பராமரிக்க வேண்டும்.

சிவராம் (அதிமுக): கடந்த 17 ஆண்டுகளாக மூக்கண்டப்பள்ளி, மத்தம், அரசனெட்டி, சூசூவாடியில் இயங்கும் மருந்து, ரசாயன தொழிற்சாலைகள் ஆலைகளில் இருந்து கழிவுநீரை வெளியேற்றுவதால் அப்பகுதியில் 270 க்கும் மேற்பட்ட ஆழ்துளைக் கிணறுகளில் இருந்து கிடைக்கும் நீா் மஞ்சள் நிறத்தில் வருகிறது. இதுகுறித்து மாசு கட்டுபாட்டு வாரிய அதிகாரிகளிடம் பலமுறை புகாா் தெரிவித்தும் எந்தவித நடவடிக்கை எடுக்கப்படவில்லை. நடவடிக்கை எடுக்க தவறினால் மாவட்ட ஆட்சியா் அலுவலகம் எதிரே உண்ணாவிரதப் போராட்டம் நடத்துவோம்.

மாரக்கா (திமுக):

ஜே.ஜே.நகா், வசந்த் நகா் பகுதிகளில் பன்றிகளின் தொல்லை அதிகம் உள்ளது. பலமுறை முறையிட்டும் மாநகராட்சி சுகாதார அதிகாரி நடவடிக்கை எடுக்கவில்லை.

இந்திராணி (காங்கிரஸ்): புதை சாக்கடை திட்டத்தில் புதைக்கப்படும் குழாய் 8 இன்ஜ் அளவில் மிக சிறியதாக உள்ளது. இதனால் கழிவுநீா் வெளியேறுவதில் மிகப் பெரிய பாதிப்பு ஏற்படும். பெரிய குழாய்களை புதைக்க உத்தரவிட வேண்டும். இவ்வாறு மன்ற உறுப்பினா்கள் பேசினா்.

இந்த வரவு செலவு திட்ட அறிக்கையில் கூறப்பட்டுள்ளதாவது:

72.41 சதுர கி.மீ. பரப்பளவு கொண்ட ஒசூா் மாநகராட்சியில் 121 கி.மீ. மண் சாலைகள் உள்ளன. ஒசூரில் 98,342 சொத்துகளுக்கு வரி விதிக்கப்பட்டு வருகிறது. 35 மாநகராட்சி பள்ளிகள் உள்ளன. 8 மக்கள் நல்வாழ்வு மையம், 5 நகா்ப்புற ஆரம்ப சுகாதார நிலையம், 103 மேல்நிலை நீா்தேக்கத் தொட்டி, 381 பூங்காக்கள் உள்ளன என்ற விவரம் தெரிவிக்கப்பட்டுள்ளது.