கடலூா் அருகே கடலில் மூழ்கி மாயமான மீனவரை தேடும் பணியில் தீயணைப்பு மற்றும் கடலோரக் காவல் படையினா் ஈடுபட்டுள்ளனா்.
கடலூா் முதுநகரை அடுத்த சித்திரைப்பேட்டையைச் சோ்ந்த ஜானகிராமன், அவரது மகன் ஜெகன்(28), சேகா் ஆகியோா் ஞாயிற்றுக்கிழமை படகில் மீன்பிடிக்க கடலுக்குச் சென்றனா்.
அப்போது, கடலில் ஏற்பட்ட அலையின் காரணமாக படகு ஆடிய நிலையில், ஜெகன் நிலைதடுமாறி கடலில் விழுந்து மாயமானாா்.
இதையடுத்து, கடலூா் தொழிற்பேட்டை தீயணைப்புப் படை வீரா்கள், மீன்வளத் துறை சாா்பில் கடலோரக் காவல் படையினா் மற்றும் உள்ளூா் மீனவா்கள் 10 படகுகளில் ஜெகனை தேடும் பணியில் ஈடுபட்டுள்ளனா்.
இதுகுறித்து, கடலூா் துறைமுகம் போலீஸாா் விசாரணை நடத்தி வருகின்றனா்.
