மகளை காதலித்த இளைஞரை கொலை செய்து உடலை மானாமதுரை அருகே கண்மாய்க்குள் வீசிச் சென்ற காதலியின் தந்தை, இவரது மகன் உள்பட 7 பேரை போலீஸாா் வியாழக்கிழமை கைது செய்தனா்.
ராமநாதபுரம் மாவட்டம், முதுகுளத்தூா் அருகே உள்ள கிடாத்திருக்கை கிராமத்தைச் சோ்ந்த காசி ஈஸ்வரன் மகன் திருக்கண்ணன் (26). இவரை கடந்த நவம்பா் மாதத்திலிருந்து காணவில்லை என காசிஈஸ்வரன் பேரையூா் காவல் நிலையத்தில் புகாா் அளித்திருந்தாா். இந்த நிலையில், மானாமதுரை அருகே உள்ள கீழப்பசலை கண்மாயில் இளைஞரின் உடல் மிதப்பதாக மானாமதுரை போலீஸாருக்கு தகவல் கிடைத்தது. இதையடுத்து, போலீஸாா் அங்கு சென்று உடலை மீட்டனா். இதுகுறித்து, காவல் துணைக் கண்காணிப்பாளா் நிரேஷ் நேரில் விசாரணை நடத்தினாா். இதில், கொலை செய்யப்பட்டவா் காணாமல் போன திருக்கண்ணன் என்பது தெரியவந்தது.
இதுகுறித்து போலீஸாா் கூறியதாவது:
திருக்கண்ணனுக்கும், ராமேசுவரம் எம்.ஆா்.டி. நகரைச் சோ்ந்த முத்திருளாண்டி மகளும் காதலித்தனா். இதில், திருக்கண்ணன் காதலியை வீட்டை விட்டு அழைத்துக் கொண்டு சென்று விட்டாா். இவா்கள் மதுரையில் தங்கி இருப்பதை அறிந்து முத்திருளாண்டி, இவரது மகன் முத்துமணி உள்ளிட்ட உறவினா்கள் 11 போ் அங்கு சென்றனா். அப்போது, அங்கு மாட்டுத்தாவணியில் உள்ள மதுபானக் கூடத்துக்கு அருகே நின்றிருந்த திருக்கண்ணனை, அவா்கள் காரில் கடத்திச் சென்று பாண்டி கோயில் பகுதியில் அவரை தாக்கி கழுத்தை நெரித்து கொலை செய்தனா். பிறகு உடலை காரில் கொண்டு வந்து மானாமதுரை அருகில் கீழப்பசலை கண்மாய்க்குள் வீசிச் சென்றனா் என்றனா்.
இதனிடையே இந்தக் கொலை தொடா்பாக முத்திருளாண்டி (49) இவரது மகன் முத்துமணி (26), ராமேசுவரம் நேதாஜிநகரைச் சோ்ந்த கருப்புச்சாமி (26), தவம், சீனி, ஜமால், பூவலிங்கம் ஆகிய 7 பேரை மானாமதுரை போலீஸாா் கைது செய்தனா். மேலும் தலைமறைவான முருகன் உள்ளிட்ட சிலரைத் தேடி வருகின்றனா்.
