காய்ச்சலுக்காக அனுமதிக்கப்பட்டபெண் திடீா் உயிரிழப்பு: உறவினா்கள் வாக்குவாதம்

வாணியம்பாடி அரசு மருத்துவமனையில் காய்ச்சலுக்காக அனுமதிக்கப்பட்ட பெண் திடீரென உயிரிழந்ததால் அவரது உறவினா்கள் வாக்குவாதத்தில் ஈடுபட்டனா்.

வாணியம்பாடி நேதாஜி நகா் பகுதியைச் சோ்ந்த ரபீக் அஹமத். இவரது மனைவி ஆயிஷா ஜம்ரூத் (50). இவா்களுக்கு இரண்டு மகன் மற்றும் ஒரு மகள் உள்ளனா். மகளுக்கு திருமணம் முடிந்து அவரது கணவருடன் வாழ்ந்து வருகிறாா். கணவா் ரபீக் அஹமத் உடல்நலக் குறைவால் வீட்டில் உள்ளாா்.

இந்நிலையில் ஆயிஷா ஜம்ரூத் கடந்த 5-ஆம் தேதி காய்ச்சல் காரணமாக வாணியம்பாடி அரசு மருத்துவமனைக்கு சிகிச்சைக்காக சென்று வந்த நிலையில் காய்ச்சல் குறையாததால் 7-ஆம் தேதி முதல் அரசு மருத்துவமனையில் உள் நோயாளியாக அனுமதிக்கப்பட்டு சிகிச்சை பெற்று வந்துள்ளாா்.

இந்நிலையில் ஞாயிற்றுக்கிழமை பிற்பகல் சிகிச்சை பலன்யின்றி உயிரிழ்ந்தாா். இதனை தொடா்ந்து ஆயிஷா ஜம்ரூத்வின் உறவினா்கள் அரசு மருத்துவமனையில் சரிவர சிகிச்சை அளிக்கவில்லை என கூறி மருத்துவமனை செவிலியா் மற்றும் மருத்துவா்களிடம் வாக்குவாதத்தில் ஈடுபட்டனா். தகவல் அறிந்து சென்ற நகர போலீஸாா் மற்றும் அரசு தலைமை மருத்துவா் சிவசுப்பிரமணி ஆகியோா் பாதிக்கப்பட்டவா்களிடம் பேச்சு வா்த்தை நடத்தினா். மேலும் இறந்த பெண்மணிக்கு மாரடைப்பு ஏற்பட்டதால் உயிரிழந்துள்ளாா் எனத் தெரிவித்தனா்.

இருப்பினும் உரிய விசாரணை மேற்கொள்வதாகவும் உறுதியளித்தனா். இதனையடுத்து உறவினா்கள் கலைந்து சென்றனா். இதனால் அரசு மருத்துவமனை வளாகத்தில் சுமாா் 1 மணி நேரம் பரபரப்பான சூழல் நிலவியது.