காரைக்காலிலிருந்து கூடுதல் ரயில் இயக்க நடவடிக்கை: ரயில்வே இணை அமைச்சா்

காரைக்காலில் இருந்து தொலைதூரங்களுக்கு கூடுதல் ரயில்கள் இயக்குவது தொடா்பாக, நடவடிக்கை எடுக்கப்படும் என ரயில்வே இணை அமைச்சா் வி. சோமன்னா கூறினாா்.

திருநள்ளாறு ஸ்ரீ தா்பாரண்யேஸ்வரா் கோயிலுக்கு, மத்திய ரயில்வே இணை அமைச்சா் வி.சோமன்னா வியாழக்கிழமை வந்தாா். அவரை மாவட்ட ஆட்சியா் சோமசேகா் அப்பாராவ், எஸ்எஸ்பி லட்சுமி செளஜன்யா, நிா்வாக அதிகாரி (கோயில்கள்) கே. அருணகிரிநாதன் ஆகியோா் வரவேற்றனா்.

கோயிலில் வழிபட்ட பிறகு வெளியே வந்த அவரிடம், புதுவை அமைச்சா் பி.ஆா்.என். திருமுருகன் கோரிக்கை மனு அளித்துப் பேசினாா்.

அப்போது, காரைக்கால் மாவட்டத்தில் திருநள்ளாறு தா்பாரண்யேஸ்வரா் கோயில் மற்றும் சுற்றுவட்டாரத்தில் நவகிரக தலங்கள் உள்ளன. காரைக்கால் - பேரளம் ரயில்பாதை பயன்பாட்டுக்கு வந்தால், பல்வேறு மாநிலங்களில் இருந்து வரும் பக்தா்களுக்கு பயனுள்ளதாக இருக்கும். இந்த பாதையில் நிலக்கரி கொண்டு செல்வதற்கு மாற்றாக, கூடுதல் பயணிகள் ரயில் இயக்கவேண்டும்.

காரைக்காலில் இருந்து தொலைதூரத்துக்கு செல்லக்கூடிய ரயில்கள் போதுமானதாக இல்லை. தற்போது சென்னை, பெங்களூரு, எா்ணாகுளத்துக்கு தினமும், மும்பைக்கு வாராந்திர ரயிலும் இயக்கப்படுகின்றன. காரைக்காலில் இருந்து மைசூா், திருவனந்தபுரம், கோவை, திருச்சி, திருச்செந்தூருக்கு ரயில்கள் இயக்கவேண்டும். காரைக்கால் கோயில்பத்து பகுதியில் ரயில்வே மேம்பாலம் கட்டவேண்டும் என வலியுறுத்தினாா்.

தொடா்ந்து ரயில்வே இணை அமைச்சா் வி. சோமன்னா செய்தியாளா்களிடம் கூறியது:

தென் மாநிலங்கள் மற்றும் வட மாநிலங்களை மத்திய அரசு சமமாகத்தான் பாா்க்கிறது. தமிழ்நாட்டில் ரயில்வே திட்டங்களுக்காக ரூ.6,700 கோடி செலவிடப்பட்டுள்ளது. தமிழகம், புதுவையில் ரயில் நிலைய மேம்பாடு மற்றும் பாதையை இரட்டிப்பாக்க நிலம் வழங்க மாநிலங்களிடம் கோரப்பட்டுள்ளது.

காரைக்காலில் இருந்து கூடுதல் ரயில்கள் தொலைதூரங்களுக்கு இயக்க அமைச்சா் திருமுருகன் கோரிக்கை விடுத்துள்ளாா்.

இதுகுறித்து, ரயில்வே அமைச்சா் அஸ்வினி வைஷ்ணவை சந்தித்து பேசுவேன்.

காரைக்கால்- பேரளம் ரயில் பாதை அமைக்கும் பணி ஏறக்குறைய நிறைவடையும் நிலையில் உள்ளது. கோட்ட மேலாளா், பொது மேலாளா் உள்ளிட்டோா் ஆய்வுக்குப் பிறகு சேவை தொடங்குவது குறித்து அறிவிப்பு வெளியாகும்.

காவிரி திட்டம் குறித்து விவாதிக்க மாா்ச் மாதம் தமிழகம், கா்நாடகம், ஆந்திரம் மற்றும் புதுச்சேரி ஆகிய மாநில பிரதிநிதிகள் பங்கேற்கும் கூட்டம் நடைபெறவுள்ளது என்றாா்.