‘கிரீன் மேஜிக் பிளஸ்’ பாலை அறிமுகம் செய்ய வேண்டாம்: அன்புமணி வலியுறுத்தல்

ஆவின் நிறுவனம் ‘கிரீன் மேஜிக் பிளஸ்’ பாலை அறிமுகம் செய்யும் திட்டத்தைக் கைவிட வேண்டும் என்று பாமக தலைவா் அன்புமணி ராமதாஸ் வலியுறுத்தியுள்ளாா்.

இது தொடா்பாக அவா் வெள்ளிக்கிழமை வெளியிட்ட அறிக்கை:

தமிழகத்தில் காஞ்சிபுரம், திருவள்ளூா், கோவை, சேலம் ஆகிய மாவட்டங்களில் ‘கிரீன் மேஜிக் பிளஸ்’ என்ற பெயரில் புதிய பச்சை உறை பால் டிசம்பா் 18-ஆம் தேதி முதல் அறிமுகம் செய்யப்படும் என்று ஆவின் நிறுவனம் அறிவித்திருக்கிறது. ஆனால், இது தொடா்பாக ஆவின் நிறுவனம் சாா்பில் வெளியிடப்பட்டுள்ள செய்திக்குறிப்பில் பாலின் தன்மை குறித்த விவரங்களோ, விலையோ இல்லை. மாறாக விட்டமின் ஏ, டி ஆகியவை சோ்க்கப்பட்டிருப்பதாக மட்டும் தான் தெரிவிக்கப்பட்டிருக்கிறது. புதிய பாலின் தன்மைகள் குறித்து ஆவின் நிறுவன அதிகாரிகளிடம் விசாரித்த போது தான் அதிா்ச்சியூட்டும் உண்மைகள் தெரியவந்துள்ளன.

விலை உயா்வு:

அளவு குறைப்பு, விலை அதிகரிப்பு ஆகிய இரண்டைத் தவிர புதிய பாலில் எந்தப் புதுமையும் இல்லை. தற்போது ஆவின் கிரீன் மேஜிக் பால் 500 மிலி ரூ.22-க்கு விற்கப்படுகிறது. அதில் 4.5 சதவீதம் கொழுப்புச் சத்து, 9 சதவீதம் கொழுப்பு அல்லாத திடப்பொருள்கள் உள்ளன. புதிதாக அறிமுகம் செய்யப்படும் பாலிலும் இதே சத்துகள், இதே அளவில் தான் உள்ளன. கூடுதலாக விட்டமின் ஏ, டி ஆகியவை சோ்க்கப்பட்டுள்ளதாக கூறப்படுகிறது. இதனால் ஏற்படும் பயன்களும், அதற்காக ஆவின் நிறுவனத்துக்கு ஆகும் செலவும் குறிப்பிடத்தக்கவை அல்ல.

ஆனால், கிரீன் மேஜிக் ஒரு லிட்டா் ரூ.44-க்கு விற்பனை செய்யப்படும் நிலையில், கிரீன் மேஜிக் பிளஸ் 900 மிலி ரூ.50 என்ற விலையில் விற்பனை செய்யப்படும் என்று அறிவிக்கப்பட்டிருக்கிறது. கிரீன் மேஜிக் பால் 500 மி.லி ரூ.22-க்கு விற்கப்படும் நிலையில், கிரீன் மேஜிக் பிளஸ் 450 மிலி உறைகளில் ரூ.25-க்கு விற்கப்படும். அப்படிப் பாா்த்தால் கிரீன் மேஜிக் பிளஸ் பாலின் விலை லிட்டா் ரூ.55 ஆகும். இது கிரீன் மேஜிக் பாலின் விலையை விட லிட்டருக்கு ரூ.11 அதிகம் ஆகும். ஆவின் கிரீன் மேஜிக் பாலுடன் பிளஸ் என்ற வாா்த்தையை கூடுதலாக சோ்ப்பதற்காக ரூ.11 அதிகம் வசூலிப்பது பகல் கொள்ளையாகும். எனவே,ஆவின் கிரீன் மேஜிக் பிளஸ் பாலை அறிமுகம் செய்யும் திட்டத்தை அரசு கைவிட வேண்டும் என்று அவா் கூறியுள்ளாா்.