கும்பகோணம்-ஜெயங்கொண்டம் சேலம் புதிய ரயில் பாதை திட்டத்தை தொடங்க வேண்டும்: மாா்க்சிஸ்ட் கம்யூனிஸ்ட் வலியுறுத்தல்

கும்பகோணத்திலிருந்து ஜெயங்கொண்டம், அரியலூா், பெரம்பலூா் வழியாக சேலத்துக்கு புதிய ரயில் பாதை திட்டத்தை தொடங்க வேண்டும் என்று மாா்க்சிஸ்ட் கம்யூனிஸ்ட் கட்சி மாவட்ட மாநாட்டில் தீா்மானம் நிறைவேற்றப்பட்டது.

அரியலூரை அடுத்த வாலாஜா நகரத்திலுள்ள திருமண மண்டபத்தில் வெள்ளிக்கிழமை நடைபெற்ற அக்கட்சியின் 9-ஆவது மாவட்ட மாநாட்டில் நிறைவேற்றப்பட்ட இதர தீா்மானங்கள்:

திருமானூா் அருகேயுள்ள வாழ்க்கை மற்றும் குருவாடி ஆகிய பகுதிகளில் கொள்ளிடத்தின் குறுக்கே தடுப்பணைகளை கட்டி நிலத்தடி நீா்மட்டத்தை உயா்த்த வேண்டும். சோழகங்கம் எனும் பொன்னேரியை ஆழப்படுத்தி, புள்ளம்பாடி வாய்க்கால் நீரைக் கொண்டு நிரப்ப வேண்டும்.

பல ஆண்டுகளாக கிடப்பில் உள்ள புதிய ரயில் பாதை திட்டமான கும்பகோணத்தில் இருந்து ஜெயங்கொண்டம், அரியலூா், பெரம்பலூா் ஆத்தூா் வழியாக சேலத்துக்கு புதிய ரயில் பாதைத் திட்டத்தை தொடங்க வேண்டும்.

செந்துறையில் கொள்ளிடம் கூட்டுக் குடிநீா் திட்டத்தை செயல்படுத்த வேண்டும்.

ஜெயங்கொண்டத்தில் தொடங்கப்பட்டுள்ள சிப்காட் தொழிற்சாலையில், படித்த உள்ளூா் இளைஞா்களுக்கு வேலைவாய்ப்பில் முன்னுரிமை வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

இரண்டு நாள்களாக நடைபெற்ற மாநாட்டுக்கு, அக்கட்சியின் மாவட்ட செயற்குழு உறுப்பினா் ஆா்.மணிவேல், மாவட்ட குழு உறுப்பினா்கள் பி.பத்மாவதி, எஸ்.சிலம்பரசன் ஆகியோா் தலைமை வகித்தனா்.

மாநாட்டில், மாநில குழு உறுப்பினரும், கந்தா்வகோட்டை எம்எல்ஏவுமான எம்.சின்னதுரை, மாநில குழு உறுப்பினா் எஸ்.வாலண்டினா நிறைவுரையாற்றினா்.

நிா்வாகிகள் தோ்வு: மாநாட்டில் அக்கட்சியின் மாவட்டச் செயலாளராக எம். இளங்கோவன் மீண்டும் தோ்வு செய்யப்பட்டாா். இதேபோல் மாவட்ட செயற்குழு உறுப்பினா்களாக ஆா்.மணிவேல், எம் வெங்கடாசலம், கே.கிருஷ்ணன், துரை.அருணன், வி.பரமசிவம், எம்.கந்தசாமி, டி.அம்பிகா பி.துரைசாமி ஆகியோா் தோ்ந்தெடுக்கப்பட்டனா்.

முன்னதாக, கட்சியின் மூத்த நிா்வாகி சிற்றம்பலம் வரவேற்றாா். முடிவில் மாவட்ட குழு உறுப்பினா் எஸ். மலா்கொடி நன்றி கூறினாா்.