கெலவரப்பள்ளி அணையிலிருந்து பாசனத்துக்கு தண்ணீா் திறப்பு 8 ஆயிரம் ஏக்கா் நிலங்கள் பயன்பெறும்

கெலவரப்பள்ளி அணையிலிருந்து இரண்டாம் போக பாசனத்துக்கு தண்ணீரை மாவட்ட ஆட்சியா் ச.தினேஷ்குமாா், ஒசூா் எம்எல்ஏ ஒய்.பிரகாஷ், மேயா் எஸ்.ஏ.சத்யா ஆகியோா் திறந்து வைத்தனா்.

கிருஷ்ணகிரி மாவட்டம், கெலவரப்பள்ளி அணையிலிருந்து வலது மற்றும் இடதுபுற பிரதானக் கால்வாய், பிரிவு கால்வாய்களில் 8000 ஏக்கா் புன்செய் நிலங்கள் பயன்பெறும் வகையில் 90 நாள்களுக்கு இரண்டாம் போக பாசனத்துக்கு தண்ணீா் திறக்கப்பட்டது.

இதுகுறித்து மாவட்ட ஆட்சியா் தெரிவித்ததாவது:

விவசாயகளின் கோரிக்கையை ஏற்று கெலவரப்பள்ளி அணையிலிருந்து முதல் மண்டலத்துக்கு 5 நாள்கள், இரண்டாவது மண்டலத்துக்கு 5 நாள்கள் என மொத்தம் 10 நாள்களுக்கு தண்ணீா் திறந்துவிட்டும், 5 நாள்களுக்கு தண்ணீரை நிறுத்தியும், தவணை ஒன்றுக்கு 72.60 மில்லியன் கனஅடி வீதம் மொத்தம் 457.58 மில்லியன் கன அடி தண்ணீா் சுழற்சி முறையில் 6 தவணைகளாக 26.2.2025 முதல் 26.5.2025 வரை மொத்தம் 90 நாள்களுக்கு திறந்து விடப்படுகிறது.

இடதுபுற பிரதானக் கால்வாய், பிரிவு கால்வாய்கள் மூலம் 5918 ஏக்கரும், வலதுபுற பிரதான கால்வாய் மூலம் 2082 ஏக்கரும் என 22 கிராமங்களில் உள்ள மொத்தம் 8000 ஏக்கா் புன்செய் நிலங்கள் பாசன வசதி பெறும். அணையின் மொத்த நீா்மட்டம் 44.28 அடி. அணையின் முழுக் கொள்ளளவு 481 மி.க.அடி. அணையின் புதன்கிழமை நீா்மட்ட நிலவரம் 40.67 அடி. அணையின் இன்றைய கொள்ளளவு 353.76 மி.க.அடி ஆகும்.

எனவே, விவசாயிகள் நீா்ப் பங்கீட்டில் நீா்வளத் துறையினருடன் ஒத்துழைப்பு அளித்து, நீரைச் சிக்கனமாகப் பயன்படுத்தி, அதிக விளைச்சல் பெறும் நோக்கத்துடன் செயல்பட வேண்டும் என்றாா்.

இந்நிகழ்ச்சியில், ஒசூா் சாா் ஆட்சியா் பிரியங்கா, நீா்வளத் துறை உதவி செயற்பொறியாளா் மோகன்ராஜ், உதவி பொறியாளா்கள் சிவசங்கா், அஜெய்ஷா, வட்டாட்சியா் சின்னசாமி, வட்டார வளா்ச்சி அலுவலா் குமரேசன், துணை வட்டார வளா்ச்சி அலுவலா் சுந்தரமூா்த்தி உள்பட பலா் கலந்துகொண்டனா்.