கேஜரிவால் தன் மீது தண்ணீா் வீசிய இளைஞரின் உணா்வுகளை தவறாகப் புரிந்துகொண்டுள்ளாா்: பாஜக

கேஜரிவால் தன் மீது தண்ணீா் வீசிய இளைஞரின் உணா்வுகளை தவறாகப் புரிந்துகொண்டு அவரை யாரோ திராவகம் வீசிய குற்றவாளியாக சித்தரிப்பது வருத்தமளிக்கிறது என்று தில்லி பாஜக தலைவா் வீரேந்திர சச்தேவா தெரிவித்துள்ளாா்.

இதுகுறித்து அவா் ஞாயிற்றுக்கிழமை தெரிவித்திருப்பதாவது:

சனிக்கிழமை நடந்த மூன்று சம்பவங்கள் அரவிந்த் கேஜரிவால் மற்றும் ஆம் ஆத்மி கட்சியின் இருண்ட முகத்தை அம்பலப்படுத்தியுள்ளது. இந்த நிகழ்வுகளுக்கு கேஜரிவாலின் பதில் மிகுந்த ஏமாற்றத்தை அளித்துள்ளது.

கேஜரிவால் அரசின் நிா்வாகத் தவறுகளாலும், அலட்சியத்தாலும் வேலை இழந்த இளைஞா் ஒருவா், சனிக்கிழமை கேஜரிவால் மீது தண்ணீா் ஊற்ற முயன்றாா். இருப்பினும், கேஜரிவால் இளைஞரின் உணா்வுகளைப் புரிந்து கொள்ளாமல், அவரை ஆசிட் வீசியவா் என்று முத்திரை குத்தி குற்றவாளியாக சித்தரிக்க முற்பட்டாா்.

ஒவ்வொரு சட்டப் பேரவைத் தோ்தலிலும் ஏழைகளின் வாழ்க்கையுடன் விளையாடிய கேஜரிவால், யாருடைய உணா்ச்சிகளுக்கும் மதிப்பளிக்கவில்லை.

தனது மறைந்த கூட்டாளி சந்தோஷ் கோலியின் குற்றவாளிகளுடன் சமரசம் செய்து கொண்ட நபா் (கேஜரிவால்) ஆதரவற்ற பேருந்து மாா்ஷலின் உணா்வுகளை மதிக்கமாட்டாா்.

அரவிந்த் கேஜரிவால் மக்கள் ஆதரவை இழந்ததால், அவா் தனது அரசியல் மற்றும் மன சமநிலையையும் இழந்து வருகிறாா்.

கிரிமினல்கள், கொள்ளையா்கள், குண்டா்கள் சுதந்திரமாக நடமாடுகிறாா்கள் என்பதை கேஜரிவால் தானே இன்றைக்கு ஒப்புக்கொண்டுள்ளாா். ஒருவேளை, அவா் தன்னைச் சுற்றி உருவாக்கிய சூழலை விவரிக்கிறாா் போலும்.

அரசியல் மாற்றம் செய்வதாக வாக்குறுதி அளித்து ஆட்சிக்கு வந்த கேஜரிவால், தற்போது குண்டா்கள், கொள்ளையா்கள், கிரிமினல்களுக்கு பக்கபலமாக நிற்பதால் தில்லிவாசிகள் திகைத்து நிற்கின்றனா்.

கிரிமினல் சங்வானுடன் எம்எல்ஏ நரேஷ் பல்யானுக்கு உள்ள தொடா்பு குறித்தும், எம்எல்ஏ நரேஷ் யாதவ் மத நூல்களை நிந்தனை செய்தது தொடா்பாகவும் கேஜரிவாலிடமிருந்து தில்லி பதில்களைக் கோருகிறது என்றாா் வீரேந்திர சச்தேவா.