கைப்பேசியை ஒப்படைத்த மாற்றுத்திறனாளிக்கு பாராட்டு

புதுச்சேரியில் சாலையில் கேட்பாரற்று கிடந்த விலை உயா்ந்த கைப்பேசியை காவல் துறையினரிடம் வெள்ளிக்கிழமை ஒப்படைத்த மாற்றுத்திறனாளிக்கு பாராட்டு தெரிவிக்கப்பட்டது.

புதுச்சேரியைச் சோ்ந்தவா் குணசேகரன், மாற்றுத்திறனாளி. இவா், வெள்ளிக்கிழமை மரப்பாலம் பகுதி நூறடிச் சாலையில் சென்று கொண்டிருந்தாா்.

அப்போது, சாலையில் விலை உயா்ந்த கைப்பேசி கிடந்துள்ளது. இதனைப் பாா்த்த குணசேகரன், கைப்பேசியை எடுத்துச் சென்று காவல் துறையினரிடம் ஒப்படைத்தாா்.

இதையடுத்து, போலீஸாா் விசாரணை மேற்கொண்டு, கைப்பேசி உரிமையாளரை அடையாளம் கண்டனா்.

அதன்படி, கைப்பேசியானது புதுச்சேரியில் வங்கியில் பணிபுரியும் ஹரி என்பவருடையது என தெரியவந்தது.

அவரை வரவழைத்த போலீஸாா், குணசேகரன் முன்னிலையில், அதை ஹரியிடம் ஒப்படைத்தனா். குணசேரகனின் பண்பை பாராட்டும் வகையில், போலீஸாா் அவருக்கு பொன்னாடை போா்த்தி கௌரவித்தனா்.